ఆదర్శ కుటుంబం తో ప్రేక్షకుల మనసులు గెలుస్తాం.. సిక్సర్ల వర్షం కురిపిస్తాం: విక్టరీ వెంకటేష్

‘ఆదర్శ కుటుంబం’తో ప్రేక్షకుల మనసులు గెలుస్తాం.. సిక్సర్ల వర్షం కురిపిస్తాం: విక్టరీ వెంకటేష్

కుటుంబం కోసం ఒక సామాన్య వ్యక్తి ఎంత దూరం వెళ్లగలడన్నదే ‘ఆదర్శ కుటుంబం’ కథ: త్రివిక్రమ్ శ్రీనివాస్

విక్టరీ వెంకటేష్, మాటల మాంత్రికుడు త్రివిక్రమ్ శ్రీనివాస్ కలయికలో తెరకెక్కిన మోస్ట్ అవైటెడ్ ఫ్యామిలీ ఎంటర్‌టైనర్ ‘ఆదర్శ కుటుంబం – హౌస్ నంబర్ 47’ ప్రీ రిలీజ్ ఈవెంట్ హైదరాబాద్‌లోని శిల్పకళా వేదికలో మంగళవారం సాయంత్రం ఘనంగా జరిగింది. ఈ కార్యక్రమంలో చిత్ర బృందం పాల్గొని సినిమా విశేషాలను పంచుకుంది.

హారిక అండ్ హాసిని క్రియేషన్స్ బ్యానర్‌పై ఎస్. రాధాకృష్ణ (చినబాబు) నిర్మిస్తున్న ఈ చిత్రంలో శ్రీనిధి శెట్టి కథానాయికగా నటించగా, నారా రోహిత్, నివేదా పేతురాజ్ కీలక పాత్రల్లో కనిపించనున్నారు. థమన్ ఎస్ సంగీతాన్ని అందించారు.

వెంకటేష్, త్రివిక్రమ్ కాంబినేషన్‌లో 20 ఏళ్ల తర్వాత వస్తున్న సినిమా కావడంతో ఈ చిత్రంపై ప్రేక్షకుల్లో భారీ అంచనాలు నెలకొన్నాయి. ఇప్పటికే విడుదలైన టీజర్, ట్రైలర్, పాటలకు మంచి స్పందన లభించింది. కుటుంబ అనుబంధాలు, భావోద్వేగాలు, హాస్యం, ఉత్కంఠభరితమైన సన్నివేశాలతో అలరించనున్న ఈ చిత్రం అక్టోబర్ 30న ప్రపంచవ్యాప్తంగా థియేటర్లలో విడుదల కానుంది.

విక్టరీ వెంకటేష్: ప్రేక్షకుల మనసులు గెలుస్తాం

ఈ సందర్భంగా వెంకటేష్ మాట్లాడుతూ.. “త్రివిక్రమ్, నేను కలిసి సినిమా చేసి 20 ఏళ్లు అయింది. ఇంత గ్యాప్ తర్వాత మళ్లీ సినిమా చేయాలంటే ఎలాంటి కథను ఎంచుకోవాలనే విషయంలో కొంత ఒత్తిడి ఉంటుంది. ‘నువ్వు నాకు నచ్చావ్’, ‘మల్లీశ్వరి’ వంటి సినిమాల తర్వాత అలాంటి కథను ఎంచుకోవడం సవాలుతో కూడుకున్న విషయం. అయితే త్రివిక్రమ్ అద్భుతమైన కథతో నా దగ్గరకు వచ్చారు. అందులో కావాల్సిన అన్ని అంశాలు ఉన్నాయి.

ఇది కేవలం కామెడీ సినిమా మాత్రమే కాదు. థ్రిల్లింగ్ అంశాలు, సస్పెన్స్, ఎన్నో భావోద్వేగాలు ఇందులో ఉంటాయి. కథ విన్న వెంటనే నాకు చాలా ఆనందం కలిగింది. ఇన్ని అంశాలను చక్కగా మేళవించిన కథ ఇది.

నేను గతంలో ఎన్నో ఫ్యామిలీ ఎంటర్‌టైనర్స్ చేశాను. కానీ ‘ఆదర్శ కుటుంబం’ నాకు చాలా ప్రత్యేకమైన సినిమా. ఎలాంటి పరిస్థితులు ఎదురైనా నా కుటుంబాన్ని కాపాడుకోవాలి, వారి కోసం నిలబడాలి, వారికి అండగా ఉండాలి అనే భావన ఈ సినిమాలో ప్రధానంగా ఉంటుంది.

నా అభిమానులు మొదటి నుంచి నాపై చూపిస్తున్న ప్రేమ, అభిమానం వెలకట్టలేనివి. వారికి ఎప్పటికీ రుణపడి ఉంటాను. మన భారత క్రికెటర్లు సిక్సర్లు కొడుతున్నట్లే.. ఈ సినిమాతో మేము కూడా స్టేడియం బయటకు వెళ్లేలా సిక్సర్లు కొట్టబోతున్నాం. సినిమా అద్భుతంగా వచ్చింది.

ఈ చిత్రంలో భాగమైన ప్రతి ఒక్కరికీ, ముఖ్యంగా దర్శకుడు త్రివిక్రమ్, నిర్మాతలు చినబాబు, నాగవంశీ గార్లకు నా హృదయపూర్వక ధన్యవాదాలు” అని అన్నారు.

త్రివిక్రమ్ శ్రీనివాస్: కుటుంబం ఎప్పటికీ ఎండిపోని బావి లాంటిది

దర్శకుడు త్రివిక్రమ్ శ్రీనివాస్ మాట్లాడుతూ చిత్ర సంగీత దర్శకుడు థమన్‌తో తన అనుబంధాన్ని, వెంకటేష్‌తో తన ప్రయాణాన్ని గుర్తుచేసుకున్నారు. కుటుంబ బంధాల ప్రాధాన్యాన్ని వివరిస్తూ సినిమా కథా నేపథ్యాన్ని వెల్లడించారు.

“ఎంత అందమైన ఫొటో అయినా, పెయింటింగ్ అయినా దాన్ని ప్రదర్శించడానికి ఒక గోడ కావాలి. ఈ సినిమాకు థమన్ అలాంటి గోడలా నిలిచారు. తన బ్యాక్‌గ్రౌండ్ స్కోర్‌తో సినిమాకు బలాన్ని అందించారు. ఈ రోజు తెల్లవారుజామునే బ్యాక్‌గ్రౌండ్ స్కోర్ పూర్తి చేశాం.

థమన్‌కు నా కృతజ్ఞతలు ఎలా చెప్పాలో తెలియలేదు. అందుకే ఆయన మాట్లాడుతున్నప్పుడు వెనుకకు వెళ్లి నిలబడ్డాను. ఆయన సంగీతం ద్వారా తన భావాలను వ్యక్తపరచగలరు. నాకు అలా సాధ్యం కాదు కాబట్టి, ఆయన భుజంపై చేయి వేసి నా భావాన్ని తెలియజేశాను.

వెంకటేష్ గారి ‘పవిత్ర బంధం’ సినిమాతో నా రచనా ప్రయాణం మొదలైంది. ఒక రకంగా ఆయన దగ్గరే నేను మొదటి పాఠాలు నేర్చుకున్నాను. ‘పెళ్లి చేసుకుందాం’ సమయంలో నేను ఎవరో కూడా పెద్దగా తెలియకపోయినా ఆయన నన్ను ప్రోత్సహించారు.

‘నువ్వు నాకు నచ్చావ్’ కథ చెప్పినప్పుడు నాపై ఆయనకు అంత నమ్మకం ఎలా కలిగిందో ఇప్పటికీ తెలియదు. కథ చెప్పడం పూర్తయిన వెంటనే నిర్మాత రవికిషోర్ గారు, దర్శకుడు కె. విజయభాస్కర్ గారితో ఆయన మాట్లాడి సినిమా ముందుకు తీసుకెళ్దామని చెప్పారు. ఎవరేమన్నా సినిమా చేద్దామని ఆయన తీసుకున్న నిర్ణయం నా జీవితాన్ని మార్చింది. ఆ నమ్మకానికి నేను ఎప్పటికీ కృతజ్ఞుడిని.

ఇప్పటికీ ఆయన మమ్మల్ని అదే విధంగా ప్రోత్సహిస్తున్నారు. బ్యాక్‌గ్రౌండ్ స్కోర్ సమయంలో ప్రతిరోజూ నాలుగైదు గంటలపాటు మాతో కూర్చునేవారు. ఆయన ఉనికి మాకు ఎంతో ఉత్సాహాన్ని ఇచ్చింది.

ఈ సినిమాలో పనిచేసిన ప్రతి ఒక్కరూ తమదైన ప్రత్యేకతను చూపించారు. ఇంటర్వెల్ సీక్వెన్స్‌లో కెవిన్ మాస్టర్ పనితనం ప్రేక్షకులను ఆకట్టుకుంటుంది. ఆయన కేవలం ఫైట్ కంపోజ్ చేయలేదు.. ఒక సన్నివేశాన్నే అద్భుతంగా తీర్చిదిద్దారు. భాను మాస్టర్ కూడా మొదటి నుంచి మాతో కలిసి పనిచేశారు. రామజోగయ్య శాస్త్రి గారితో మా అనుబంధం కుటుంబ సభ్యుల్లాంటిది.

శ్రీనిధి శెట్టి కథ విన్న వెంటనే ఈ సినిమా చేయడానికి అంగీకరించారు. నివేదా పేతురాజ్ కూడా మా కుటుంబ సభ్యురాలిలాంటివారు. కథ వినకుండానే ఈ సినిమాలో భాగమయ్యేందుకు ఒప్పుకున్నారు. సెట్స్‌లో సత్య నటనను మేమెంతో ఆస్వాదించాం. థియేటర్లలో ప్రేక్షకులు కూడా అంతే ఆనందిస్తారని నమ్ముతున్నాను” అని తెలిపారు.

కుటుంబం కోసం ఎంత దూరమైనా వెళ్లే వ్యక్తి కథ

“కుటుంబం అనేది మనకు లభించేది. మనం ఎంచుకునేది కాదు. మనం ఎలాంటి తల్లిదండ్రులకు పుడతాం, ఏ ఊరిలో పెరుగుతాం, ఏ ఇంట్లో జీవిస్తాం అనేది మన చేతుల్లో ఉండదు. ఆ బంధాలు మనకు సహజంగా వస్తాయి. కానీ స్నేహితులను మనమే ఎంచుకుంటాం. ప్రేమ కోసం మనమే ప్రయత్నిస్తాం, పోరాడతాం.

‘ఆదర్శ కుటుంబం’ మనకు లభించిన కుటుంబం, ఆ కుటుంబంతో ఏర్పడే బంధాల చుట్టూ తిరిగే కథ. ఇందులో చిట్టిబాబు, స్వర్ణ, సంపూర్ణ, సర్వ అనే నలుగురు వ్యక్తులు తమ కుటుంబాన్ని కాపాడుకోవడానికి ఎంత దూరం వెళ్తారన్నది చూపించాం. ఒక సామాన్య వ్యక్తి పరిస్థితులు ఎదురైనప్పుడు ఎంతవరకు వెళ్లగలడు? అన్నదే ఈ సినిమా ప్రధాన ప్రశ్న.

మన చుట్టూ అత్యాశ, కోరికలు, సంఘర్షణలు పెరుగుతున్నాయి. ఇలాంటి పరిస్థితుల్లో కుటుంబం మనిషికి అండగా నిలిచే ముఖ్యమైన బంధం. ఆ బంధాలు కూడా దూరమైతే మనిషి జీవితానికి అర్థం ఏముంటుంది? అందుకే కుటుంబ సంబంధాలు, కుటుంబ విలువల గురించి కథలు చెప్పడానికి నేను ఇష్టపడతాను.

కొన్ని బావుల నుంచి ఎంత నీరు తోడినా అవి ఎప్పటికీ ఎండిపోవు. కుటుంబం కూడా అలాంటిదే. మనసుకు తృప్తిని, భావోద్వేగాలకు ఊరటనిచ్చే లోతైన బావి లాంటిది. కుటుంబాల్లోని ఆనందాలు, సమస్యలు, భయాలు, సంఘర్షణలు, వాటికి లభించే పరిష్కారాలు.. ఇవన్నీ కథలుగా చెప్పడానికి అద్భుతమైన అంశాలు. ఇలాంటి కథలను వెంకటేష్ గారి కంటే బాగా ఎవరు చేయగలరు? ఆయన నిజమైన ఫ్యామిలీ ఎంటర్‌టైనర్.

కుటుంబం కూడా ఒక పద్మవ్యూహం లాంటిదే. అందులోకి అభిమన్యుడిలా వెళ్లి బయటకు రాలేకపోతామా? లేక అర్జునుడిలా ప్రవేశించి విజయంతో బయటకు వస్తామా? అన్నది ఈ సినిమా వివరిస్తుంది” అని త్రివిక్రమ్ పేర్కొన్నారు.

చివరగా ఆంధ్రప్రదేశ్‌లో నెలకొన్న తుఫాను పరిస్థితులపై ఆందోళన వ్యక్తం చేసిన ఆయన, ప్రజలంతా క్షేమంగా ఉండాలని ఆకాంక్షించారు.

శ్రీనిధి శెట్టి: త్రివిక్రమ్ దర్శకత్వంలో నటించడం అదృష్టం

శ్రీనిధి శెట్టి మాట్లాడుతూ.. “అక్టోబర్ 30న ‘ఆదర్శ కుటుంబం’ విడుదలవుతోంది. ప్రేక్షకులందరూ ఈ సినిమాను చూసి ఆనందిస్తారని ఆశిస్తున్నాను. ఈ ప్రాజెక్టులో భాగమైన ప్రతి ఒక్కరికీ ధన్యవాదాలు.

తెలుగు అమ్మాయిలా సహజంగా కనిపించాలనే ఉద్దేశంతో నా పాత్రకు నేనే డబ్బింగ్ చెప్పుకున్నాను. హారిక అండ్ హాసిని క్రియేషన్స్‌లో పనిచేయడం చాలా సంతోషంగా ఉంది. చినబాబు గారు, నాగవంశీ గారు ఎంతో సహకరించారు.

త్రివిక్రమ్ గారి దర్శకత్వంలో పనిచేసే అవకాశం రావడం నా అదృష్టంగా భావిస్తున్నాను. ప్రతి నటుడు ఆయన దర్శకత్వంలో పనిచేయాలని కోరుకుంటాను. వెంకటేష్ గారిని ప్రేక్షకులు ఎన్నో దశాబ్దాలుగా అభిమానిస్తున్నారు. ఆయనతో కలిసి పనిచేసిన సమయంలో చాలా విషయాలు నేర్చుకున్నాను” అని అన్నారు.

థమన్ ఎస్: ఇది పాటలకే కాదు.. మాటలకు కూడా ప్రాధాన్యమున్న సినిమా

సంగీత దర్శకుడు థమన్ మాట్లాడుతూ.. “వెంకటేష్ గారు, త్రివిక్రమ్ గారి కలయికలో సినిమా కోసం చాలా కాలంగా ఎదురుచూస్తున్నాను. ‘నువ్వు నాకు నచ్చావ్’ సినిమా నుంచి వారి చిత్రాలను ఇష్టపడుతున్నాను. ఈ కాంబినేషన్‌లో పనిచేయడం నా కల నెరవేరినట్లుగా ఉంది.

ఇది కేవలం పాటల సినిమా కాదు.. మాటలకు కూడా ఎంతో ప్రాధాన్యం ఉన్న సినిమా. త్రివిక్రమ్ గారి సంభాషణలు నాకు ఎప్పుడూ ఇష్టం. ‘ఆదర్శ కుటుంబం’ కొత్త అనుభూతిని అందిస్తుంది. ఈ సినిమాకు ప్రత్యేకమైన బ్యాక్‌గ్రౌండ్ స్కోర్ రూపొందించాం. మరో ఏడు ట్రాక్‌లు కూడా రావాల్సి ఉన్నాయి. అవి ప్రేక్షకులను ఆకట్టుకుంటాయని నమ్ముతున్నాను.

‘అతడు’ సినిమాకు మణిశర్మ గారి దగ్గర ప్రోగ్రామర్‌గా పనిచేసినప్పుడు త్రివిక్రమ్ గారిని దగ్గరగా గమనించే అవకాశం వచ్చింది. అప్పుడే ఆయన ప్రతిభను గుర్తించాను. ‘అరవింద సమేత వీర రాఘవ’ సినిమా తర్వాత నా జీవితంలో కొత్త అధ్యాయం ప్రారంభమైంది. అందుకు త్రివిక్రమ్ గారికి కృతజ్ఞతలు.

నిర్మాత రాధాకృష్ణ గారు నాణ్యత విషయంలో ఎప్పుడూ రాజీ పడరు. వెంకటేష్ గారు అందరినీ ఉత్సాహపరుస్తూ ముందుకు నడిపిస్తారు. ‘ఆదర్శ కుటుంబం’ ఘనవిజయం సాధిస్తుందని నమ్ముతున్నాను” అని తెలిపారు.

నివేదా పేతురాజ్: షూటింగ్‌లో ప్రతి రోజూ సెలవులా అనిపించేది

నివేదా పేతురాజ్ మాట్లాడుతూ.. “ఈ సినిమా షూటింగ్‌లో ప్రతి రోజూ సెలవు రోజుగా అనిపించేది. మళ్లీ సెట్స్‌కు వెళ్లాలని ఎదురుచూసేదాన్ని. మొత్తం టీమ్ ఎంతో సానుకూలమైన వాతావరణంలో పనిచేసింది. ఈ సినిమాలో భాగం కావడం నా అదృష్టం.

వెంకటేష్ గారు గొప్ప నటుడే కాదు.. అద్భుతమైన మనిషి కూడా. ఆయనతో కలిసి నటించడం చాలా ఆనందంగా ఉంది. థమన్ మంచి సంగీతాన్ని అందించారు.

హారిక అండ్ హాసిని క్రియేషన్స్‌లో ఇది నా రెండో సినిమా. ‘అల వైకుంఠపురములో’ సినిమాతో త్రివిక్రమ్ గారు నాకు మంచి గుర్తింపునిచ్చారు. ఈ సినిమాలో అవకాశం ఇచ్చిన త్రివిక్రమ్ గారు, చినబాబు గారికి నా కృతజ్ఞతలు. అక్టోబర్ 30న సినిమా విడుదల కోసం ఆసక్తిగా ఎదురుచూస్తున్నాను” అని అన్నారు.

త్రివిక్రమ్ మాటలు పలకడం అదృష్టం: బ్రహ్మాజీ

నటుడు బ్రహ్మాజీ మాట్లాడుతూ.. “త్రివిక్రమ్ గారి దాదాపు అన్ని సినిమాల్లోనూ నటించాను. ఆయన సినిమాల షూటింగ్‌లో చాలా సరదాగా ఉంటుంది. ఆయన రాసిన మాటలను తెరపై పలికే అవకాశం రావడం ఏ నటుడికైనా అదృష్టమే. ఆ అవకాశం నాకు లభించింది.

ఎన్ని విజయాలు సాధించినా వెంకటేష్ గారు ఎంతో నిరాడంబరంగా ఉంటారు. నిర్మాత చినబాబు గారు నన్ను ఎప్పుడూ ప్రోత్సహిస్తుంటారు. అక్టోబర్ 30న విడుదల కానున్న ‘ఆదర్శ కుటుంబం’ను ప్రేక్షకులందరూ చూసి ఆదరించాలని కోరుకుంటున్నాను” అని తెలిపారు.

ఘనంగా ప్రీ రిలీజ్ వేడుక

యాంకర్ సుమ ఈ కార్యక్రమాన్ని తనదైన శైలిలో ఉత్సాహంగా నిర్వహించారు. నటులు రజిత, సత్య, ఉదయ్‌బీర్ సంధు, యువినా, రాజ్ ప్రజ్వల్, గేయ రచయిత రామజోగయ్య శాస్త్రి, కొరియోగ్రాఫర్ భాను మాస్టర్, ఫైట్ మాస్టర్ కెవిన్‌తో పాటు పలువురు చిత్ర బృంద సభ్యులు ఈ వేడుకలో పాల్గొన్నారు.

వెంకటేష్, త్రివిక్రమ్‌ల క్రేజీ కాంబినేషన్, కుటుంబ బంధాలకు ప్రాధాన్యమిచ్చే కథ, భావోద్వేగాలు, వినోదం, థమన్ సంగీతం వంటి అంశాలతో ‘ఆదర్శ కుటుంబం – హౌస్ నంబర్ 47’పై ప్రేక్షకుల్లో ఆసక్తి నెలకొంది. ఈ చిత్రం అక్టోబర్ 30న ప్రపంచవ్యాప్తంగా థియేటర్లలో విడుదల కానుంది.

కుటుంబాన్ని కాపాడుకోవడానికి ఒక సామాన్య వ్యక్తి ఎంత దూరం వెళ్లగలడు? అనే ఆసక్తికరమైన ప్రశ్నకు సమాధానంగా ఈ సినిమా ప్రేక్షకుల ముందుకు రానుంది.