Vijay Deverakonda
“రణబాలి” భావోద్వేగాలతో కూడిన గొప్ప సినిమాటిక్ అనుభూతిని అందిస్తుంది: విజయ్ దేవరకొండ
చరిత్రలో మరుగునపడిన వీరుల కథలను ప్రపంచానికి చూపించాలనేదే మా లక్ష్యం – విజయ్ దేవరకొండ
విజయ్ దేవరకొండ హీరోగా నటిస్తున్న భారీ పాన్ ఇండియా చిత్రం ‘రణబాలి’ ప్రపంచవ్యాప్తంగా అక్టోబర్ 16న విజయదశమి సందర్భంగా గ్రాండ్ థియేట్రికల్ రిలీజ్‌కు సిద్ధమవుతోంది. రాహుల్ సంకృత్యన్ దర్శకత్వం వహిస్తున్న ఈ చిత్రంలో రష్మిక మందన్న హీరోయిన్‌గా నటిస్తోంది. టీ-సిరీస్ సమర్పణలో మైత్రీ మూవీ మేకర్స్ బ్యానర్‌పై నవీన్ యెర్నేని, వై. రవిశంకర్ భారీ బడ్జెట్‌తో ఈ చిత్రాన్ని నిర్మిస్తున్నారు.
భారతదేశ చరిత్రలో మరుగునపడిన అధ్యాయాలు, బ్రిటిష్ పాలనలో ప్రజలు ఎదుర్కొన్న కష్టాలు, తమ ప్రజల కోసం పోరాడిన వీరుల కథల నేపథ్యంలో ‘రణబాలి’ తెరకెక్కుతోంది. చరిత్ర, సంస్కృతి, భావోద్వేగాలు, యాక్షన్ అంశాల కలయికతో ప్రేక్షకులకు ఒక సరికొత్త సినిమాటిక్ అనుభూతిని అందించేందుకు చిత్రబృందం సిద్ధమవుతోంది.
ఈ నేపథ్యంలో హీరో విజయ్ దేవరకొండ మీడియాతో ముచ్చటించారు. సినిమా నేపథ్యం, చారిత్రక అంశాలపై చేసిన పరిశోధన, తన పాత్ర కోసం చేసిన కృషి, రష్మిక మందన్నతో నటించిన అనుభవం, దర్శకుడు రాహుల్ సంకృత్యన్ పనితీరు, సినిమా నుంచి ప్రేక్షకులు ఆశించవచ్చిన అంశాల గురించి ఆయన పంచుకున్న విశేషాలు ఇవి.
“రణబాలి ఒక ప్రత్యేకమైన ఉద్దేశంతో చేసిన సినిమా”
ప్రశ్న: ‘రణబాలి’ సినిమాపై మీ నమ్మకం ఎలా ఉంది? సినిమా ప్రమోషన్స్‌ను ఎలా తీసుకుంటున్నారు?
విజయ్ దేవరకొండ: ‘పెళ్లి చూపులు’ తర్వాత నేను చాలా కంఫర్ట్‌గా ప్రమోషన్స్ చేస్తున్న సినిమా ‘రణబాలి’. సినిమాను ఒకటికి రెండుసార్లు చెక్ చేసుకుని, అన్ని విషయాల్లోనూ జాగ్రత్తలు తీసుకుని విడుదలకు తీసుకొస్తున్నాం. మా సినిమా బ్యాక్‌డ్రాప్‌లోనే చాలా సీజీ వర్క్ ఉంది. ప్రీ ప్రొడక్షన్ సమయంలోనే విజువల్ ఎఫెక్ట్స్ ఎంత ముఖ్యమో మాకు అర్థమైంది. అందుకే ఫిబ్రవరి నెలలోనే సీజీ సీన్స్ అన్నీ పూర్తి చేశాం.
ప్రతి సినిమాను ఒక్కో కారణంతో చేస్తాం. ‘రణబాలి’ సినిమాను మాత్రం ఒక ప్రత్యేకమైన ఉద్దేశంతో చేశాం. ఇటీవల చెన్నైలో ఒక సీనియర్ జర్నలిస్ట్‌తో మాట్లాడుతున్నప్పుడు అప్పట్లో బెంగాల్‌లో సంభవించిన కరువు గురించి తెలుసుకున్నాను. ఎంతోమంది ప్రజలు ఆకలితో చనిపోయారని, అమెరికన్ పత్రికల్లో వచ్చిన కథనాల ద్వారా భారతదేశంలో బ్రిటిష్ పాలనలో జరిగిన దారుణాల గురించి ప్రపంచంలోని ఇతర ప్రాంతాల ప్రజలకు తెలిసిందని ఆయన చెప్పారు.
ఇలాంటి విషయాలు తెలుసుకున్నప్పుడు మన చరిత్రలో ఎంతటి విషాదకరమైన సంఘటనలు జరిగాయో అర్థమవుతుంది. మనకు తెలియని ఎన్నో కథలు ఇంకా ఉన్నాయి. వాటిని ప్రజలకు తెలియజేయాలనే ఉద్దేశంతోనే ఈ సినిమాను రూపొందించాం.
“మన భవిష్యత్తు గురించి ఆలోచించాలంటే మన చరిత్ర తెలుసుకోవాలి”
ప్రశ్న: భారతదేశ చరిత్రలోని మరుగునపడిన అధ్యాయాలపై సినిమా చేయాలనే ఆలోచన ఎందుకు వచ్చింది?
విజయ్ దేవరకొండ: మన ప్రజలకు గతంలో జరిగిన అన్యాయాల గురించి తెలుసుకుంటున్నప్పుడు ఆశ్చర్యం కలుగుతుంది. ఇవన్నీ నిజంగా జరిగాయా? ఇంత దారుణంగా మనుషులను చూశారా? అని అనిపిస్తుంది. కొంతమంది భారతీయులను మనుషులుగా కూడా పరిగణించని పరిస్థితులు ఉండేవి. చెట్లు, పుట్టలతో సమానంగా చూసిన సందర్భాలు ఉన్నాయి.
మన దేశ భవిష్యత్తు గురించి ఆలోచించాలంటే మన చరిత్ర గురించి తెలుసుకోవడం చాలా ముఖ్యం. చరిత్రలో జరిగిన సంఘటనలను అర్థం చేసుకున్నప్పుడే మనం భవిష్యత్తులో ఎలాంటి నిర్ణయాలు తీసుకోవాలో తెలుసుకోగలం.
‘రణబాలి’ సినిమాను మేము సరిగ్గా తెరకెక్కించగలిగితే, భవిష్యత్తులో ఇలాంటి మరిన్ని కథలు తెరపైకి వచ్చే అవకాశం ఉంటుంది. మన చరిత్రలో మరుగునపడిపోయిన అధ్యాయాలను సినిమా మాధ్యమం ద్వారా ప్రపంచానికి పరిచయం చేయవచ్చు.
అందుకే ఈ సినిమాను కేవలం ఒక కమర్షియల్ ప్రాజెక్ట్‌గా చూడలేదు. ఒక బాధ్యతగా తీసుకుని చాలా జాగ్రత్తగా రూపొందించాం. ఇలాంటి కథలను చెప్పేటప్పుడు చారిత్రక అంశాల పట్ల బాధ్యతతో వ్యవహరించడం చాలా అవసరం.
“బ్రిటిష్ పాలనలో రైల్వే వ్యవస్థ వెనుక ఆర్థిక ప్రయోజనాలు కూడా ఉన్నాయి”
ప్రశ్న: బ్రిటిష్ పాలనలో భారతీయులు ఎదుర్కొన్న పరిస్థితులను సినిమాలో ఎలా చూపించబోతున్నారు?
విజయ్ దేవరకొండ: బ్రిటిష్ వాళ్లు మొదట్లో వ్యాపారం కోసం భారతదేశానికి వచ్చారు. కానీ క్రమంగా దేశంలోని వివిధ ప్రాంతాలపై తమ ఆధిపత్యాన్ని పెంచుకున్నారు.
ఇప్పటికీ కొంతమంది ఇండియన్ రైల్వేస్‌ను బ్రిటిష్ వాళ్లు మన సౌకర్యం కోసం నిర్మించారని భావిస్తుంటారు. అయితే, ఆ రైల్వే వ్యవస్థ వెనుక వారి ఆర్థిక ప్రయోజనాలు కూడా ఉన్నాయనే విషయాన్ని మనం అర్థం చేసుకోవాలి. భారతదేశంలోని ధాన్యం, పత్తి, బంగారం, ఇతర సంపదను రవాణా చేసుకోవడానికి, ప్రధాన నౌకాశ్రయాలను అనుసంధానించడానికి రైల్వే లైన్లు ఉపయోగపడ్డాయి.
1876 నుంచి 1878 మధ్య భారతదేశంలోని అనేక ప్రాంతాల్లో తీవ్ర కరువు సంభవించింది. ముఖ్యంగా మద్రాస్ ప్రెసిడెన్సీతో పాటు ఇతర ప్రాంతాల్లో ప్రజలు తీవ్ర ఇబ్బందులు ఎదుర్కొన్నారు. ఆ సమయంలో లక్షలాది మంది ప్రాణాలు కోల్పోయారు.
కరువు వచ్చినప్పుడు ప్రజలకు సహాయం చేయాల్సిన సమయంలో కూడా పన్నుల భారం తగ్గించకుండా వసూలు చేసిన సందర్భాలున్నాయి. ఆకలితో అలమటిస్తున్న ప్రజలు కఠినమైన పనులు చేయాల్సి వచ్చేది. ఆ పనులకు ప్రతిఫలంగా చాలా తక్కువ ఆహారం ఇచ్చేవారు. పని చేయలేని పరిస్థితిలో ఉన్నవారికి ఆకలితో చనిపోవడం తప్ప మరో మార్గం ఉండేది కాదు.
ఈ విషయాలన్నీ తెలుసుకుంటుంటే మనసు కలచివేస్తుంది. చరిత్రలో యుద్ధాలు ఎప్పుడు జరిగాయి? ఎవరు పాలించారు? అనే విషయాలే కాకుండా, ఆ సమయంలో సాధారణ ప్రజలు ఎలాంటి బాధలు అనుభవించారు? అనేది కూడా తెలుసుకోవాలి.
“మన సంస్కృతి, నమ్మకాలు ప్రజలను ఒక్కటిగా నిలబెట్టాయి”
ప్రశ్న: భారతీయ సంస్కృతి, సంప్రదాయాలకు ‘రణబాలి’లో ఎలాంటి ప్రాధాన్యం ఉంటుంది?
విజయ్ దేవరకొండ: ఎలాంటి పరిస్థితులు ఎదురైనా మన సంస్కృతి, సంప్రదాయాలు, నమ్మకాలు మనల్ని ఒక సమాజంగా నిలబెట్టాయి. కరువు వచ్చినప్పుడు గ్రామాల్లోని ప్రజలు గ్రామ దేవతలను పూజించేవారు. జాతరలు నిర్వహించేవారు. వచ్చే ఏడాది అయినా పరిస్థితులు మెరుగుపడతాయని ఆశతో జీవించేవారు.
అప్పట్లో ప్రతి ఒక్కరికీ దేశానికి స్వాతంత్ర్యం రావాలనే భావన ఉండేది కాదు. తమ ప్రాంతంలోకి వచ్చిన విదేశీయులు తమపై పెత్తనం చెలాయిస్తున్నారని, తమ ఆత్మగౌరవాన్ని దెబ్బతీస్తున్నారని భావించి ఎదురు తిరిగినవారు చాలామంది ఉన్నారు.
మన చరిత్రలో ప్రజల కోసం నిలబడి పోరాడిన ఎంతోమంది గొప్ప వీరులు ఉన్నారు. వారిలో చాలామంది చిన్న వయసులోనే ప్రాణాలు కోల్పోయారు. అయినప్పటికీ వారి పోరాటాలు, ధైర్యసాహసాలు ప్రజల జ్ఞాపకాల్లో నిలిచిపోయాయి. అలాంటి వీరులే ‘రణబాలి’ సినిమాకు స్ఫూర్తి.
వారి కథలు జానపద గేయాల ద్వారా తరతరాలకు చేరాయి. ఆ తర్వాత కొంతమంది రచయితలు వాటిని పుస్తకాల రూపంలో భద్రపరిచారు.
ఆ వీరుల గొప్పదనం, మన పూర్వీకులు ఎదుర్కొన్న దారుణాలు, మన సమాజంలో జరిగిన తప్పులు, బ్రిటిష్ వాళ్లు ఈ విశాలమైన దేశంపై ఎలా ఆధిపత్యం సాధించారు వంటి అంశాలను ఈ సినిమా ద్వారా ప్రేక్షకులకు పరిచయం చేయాలనుకుంటున్నాం.
“గతంలో జరిగిన తప్పులను తెలుసుకుంటేనే భవిష్యత్తులో వాటిని నివారించగలం”
ప్రశ్న: ఈ సినిమా ద్వారా ప్రేక్షకులకు ఏం చెప్పాలనుకుంటున్నారు?
విజయ్ దేవరకొండ: వ్యాపారం కోసం వచ్చిన బ్రిటిష్ వాళ్లు భారతదేశంలోని రాజుల మధ్య విభేదాలను ఉపయోగించుకున్నారు. ఒకరి గురించి మరొకరికి చెడుగా చెప్పడం, వారి మధ్య గొడవలు సృష్టించడం ద్వారా ఒక్కో రాజ్యంపై ఆధిపత్యం సాధించారు.
అయితే, ఇందులో మన దేశానికి చెందిన కొంతమంది వ్యక్తుల దురాశ, తప్పులు, కుట్రలు కూడా ఉన్నాయి. చరిత్రను అర్థం చేసుకోవాలంటే అన్ని కోణాలను పరిశీలించాలి.
మన చరిత్ర పాఠాల్లో ప్లాసీ యుద్ధం, మైసూర్ యుద్ధాలు వంటి సంఘటనలు ఎప్పుడు జరిగాయో, ఏ తేదీన జరిగాయో గుర్తుంచుకోవాలని చెబుతారు. కానీ ఆ యుద్ధాల సమయంలో ప్రజలు ఎలాంటి బాధలు ఎదుర్కొన్నారు? వారి జీవితాలు ఎలా మారిపోయాయి? అనే విషయాల గురించి కూడా తెలుసుకోవాలి.
గతంలో మనకు ఏం జరిగిందో తెలుసుకుంటే భవిష్యత్తులో అలాంటి పరిస్థితులు పునరావృతం కాకుండా జాగ్రత్తపడవచ్చు. చరిత్ర ఎప్పుడూ ఏదో ఒక రూపంలో పునరావృతమవుతుంటుంది.
ఇప్పటికీ ప్రపంచంలోని అనేక దేశాలు యుద్ధాలు చేసుకుంటున్నాయి. మన సమాజంలో కూడా కులం, మతం, ప్రాంతం పేరుతో అడ్డుగోడలు ఉన్నాయి. ఈ విభజనలను దాటి మనుషులుగా ఒక్కటిగా ఉండటం ఎంత ముఖ్యమో అర్థం చేసుకోవాలి.
‘రణబాలి’ ప్రేక్షకులను ఆలోచింపజేసే సినిమా అవుతుందని నమ్ముతున్నాను.
“జానపదంతో ప్రారంభమయ్యే ‘రణబాలి’ ఆద్యంతం ఒక ఉద్దేశంతో సాగుతుంది”
ప్రశ్న: సినిమా ట్రైలర్‌కు మంచి స్పందన వస్తోంది. ప్రేక్షకులు ఎలాంటి అనుభూతిని పొందబోతున్నారు?
విజయ్ దేవరకొండ: ‘రణబాలి’ విజయం మీద మాకు పూర్తి నమ్మకం ఉంది. అందుకే నమ్మకంతో ప్రమోషన్స్ చేస్తున్నాం.
దర్శకుడు రాహుల్ సంకృత్యన్ ఒకసారి అనంతపురంలో జరిగిన జాతరలో తీసిన జానపద వీడియోను నాకు పంపించాడు. అందులో కళాకారులు ఎంతోమంది చారిత్రక వీరుల గురించి గొప్పగా చెబుతూ జానపద గేయాలు పాడారు. ఆ వీడియో నాకు చాలా నచ్చింది.
మా సినిమా కూడా అలాంటి జానపద కథనంతోనే ప్రారంభమవుతుంది. అప్పట్లో మన గ్రామాల్లో ఎలాంటి వాతావరణం ఉండేది? మన సంస్కృతి ఎలా ఉండేది? మన వీరులు ఎలాంటి పరిస్థితుల్లో పోరాడారు? చరిత్రలో ఏం జరిగింది? అనే అంశాలను ప్రేక్షకులకు పరిచయం చేస్తాం.
సినిమా ప్రమోషన్స్‌లో కూడా మేము అనవసరమైన హైప్‌ను సృష్టించడానికి ప్రయత్నించడం లేదు. కథకు తగ్గట్టుగా ట్రైలర్‌ను రూపొందించాం.
థియేటర్‌లో సినిమా చూడటం ప్రారంభించిన ఐదు నిమిషాల్లోనే ప్రేక్షకులు ఆ ప్రపంచంలోకి వెళ్లిపోతారని నా నమ్మకం. సినిమాలో వేగంగా సీన్లు మార్చుకుంటూ వెళ్లడం మాత్రమే ఉండదు. ప్రతి పాత్రకు, ప్రతి సన్నివేశానికి ఒక ప్రాధాన్యం ఉంటుంది. సరైన కథనంతో ప్రేక్షకులను భావోద్వేగ ప్రయాణంలోకి తీసుకెళ్తాం.
“యాక్షన్ సన్నివేశాలు కథకు అవసరమైనంత మాత్రమే ఉంటాయి”
ప్రశ్న: సినిమాలో హింసాత్మక యాక్షన్ సన్నివేశాలు ఎలా ఉండబోతున్నాయి?
విజయ్ దేవరకొండ: అప్పటి పరిస్థితులు, ఆ కాలంలో జరిగిన హింసను దృష్టిలో పెట్టుకుని మా సినిమాలో యాక్షన్ సన్నివేశాలను రూపొందించాం. వాస్తవంగా చరిత్రలో జరిగిన కొన్ని సంఘటనలు మేము సినిమాలో చూపించిన దానికంటే కూడా భయంకరంగా ఉండేవి.
అయితే, మా కథకు ఎంత అవసరమో అంతే హింసను చూపించాం. ఇది సున్నితంగా చెప్పే కథ కాదు. మేము చూపించే ప్రపంచం కూడా అంత సున్నితమైనది కాదు. అప్పట్లో విభేదాలు వస్తే కూర్చుని మాట్లాడుకుని పరిష్కరించుకునే పరిస్థితులు ప్రతిసారీ ఉండేవి కావు. చాలా సందర్భాల్లో ప్రాణాల మీదకు వచ్చేది.
కానీ సినిమాలో కేవలం యాక్షన్ కోసమే యాక్షన్ సన్నివేశాలు చేయలేదు. ప్రతి సన్నివేశం కథను ముందుకు తీసుకెళ్లాలి. పాత్ర స్వభావాన్ని తెలియజేయాలి.
సినిమా నిడివి సుమారు 2 గంటల 50 నిమిషాలు ఉంటుంది. రణబాలి పాత్రలో నా రూపం, నడవడిక, మాట్లాడే విధానం అన్నింటినీ దర్శకుడు రాహుల్ ప్రత్యేకంగా డిజైన్ చేశాడు.
ఈ సినిమా మాస్, రియలిస్టిక్ అప్రోచ్‌తో ఉంటుంది. అప్పటి ప్రపంచాన్ని సహజంగా ప్రేక్షకులకు చూపించాలన్నదే మా ప్రయత్నం.
“రాయలసీమ యాస కోసం రెండు నుంచి మూడు నెలలు సాధన చేశాను”
ప్రశ్న: రణబాలి పాత్ర కోసం మీరు ఎలాంటి శిక్షణ తీసుకున్నారు?
విజయ్ దేవరకొండ: ఈ సినిమా కోసం రాయలసీమ యాస నేర్చుకోవడంతో పాటు గుర్రపు స్వారీ కూడా సాధన చేశాను.
నేను పదేళ్ల పాటు పుట్టపర్తిలో చదువుకున్నాను. అందువల్ల రాయలసీమ యాస కొంత పరిచయం ఉంది. అయితే, ఈ పాత్రకు ఆ పరిచయం మాత్రమే సరిపోదు. పాత్ర మాట్లాడే విధానం, ఉచ్చారణ, డైలాగ్ డెలివరీ అన్నీ సహజంగా ఉండాలి.
అందుకే రెండు నుంచి మూడు నెలల పాటు యాస, డైలాగ్స్‌పై ప్రత్యేకంగా సాధన చేశాను. రణబాలి ఎలా మాట్లాడాలి? అతని మాటల్లో ఎలాంటి తీవ్రత ఉండాలి? అనే విషయాలపై రాహుల్ చాలా పరిశోధన చేశాడు. ఈ విషయంలో ఆయన చాలా కచ్చితంగా ఉంటారు.
కొన్ని సినిమాల్లో హీరోలు చాలా తక్కువగా మాట్లాడుతుంటారు. కానీ రణబాలి అలా ఉండడు. ఆ కాలంలో ఒక వీరుడు ఎలా మాట్లాడేవాడో, ఎలా తన అభిప్రాయాన్ని బలంగా వ్యక్తం చేసేవాడో ఆ విధంగా ఈ పాత్రను రూపొందించారు.
నేను ఏ సినిమాలో నటించినా అది నా నిజ జీవిత పాత్ర అన్నట్టుగా భావించి నటించడానికి ప్రయత్నిస్తాను. నేను చేసే ప్రతి సినిమా వ్యక్తిగతంగా నాపై ప్రభావం చూపిస్తుంది. నన్ను ఏదో ఒక విధంగా మారుస్తుంది. ‘రణబాలి’ కూడా నాపై అలాంటి ప్రభావాన్ని చూపించింది.
“జయమ్మ పాత్రకు రష్మిక సరైన ఎంపిక అని అనిపించింది”
ప్రశ్న: రష్మిక మందన్నను ఈ సినిమా కోసం ఎలా ఎంపిక చేశారు? మీ ఇద్దరి మధ్య కెమిస్ట్రీ ఎలా ఉంటుంది?
విజయ్ దేవరకొండ: జయమ్మ పాత్ర కోసం రష్మిక పేరు దర్శకుడు రాహుల్ సూచించాడు. నాకు కూడా ఆ పాత్రకు ఆమె సరైన ఎంపిక అనిపించింది.
గతంలో నా కొన్ని సినిమాల విషయంలో కూడా రష్మిక పేరు చర్చకు వచ్చింది. కానీ అప్పటి కథలకు ఆమె సరిపోదని అనిపించింది. మేమిద్దరం కలిసి సినిమా చేస్తే అది ప్రత్యేకంగా ఉండాలని నేను కోరుకున్నాను.
‘రణబాలి’లో మా ఇద్దరి పాత్రల మధ్య మంచి డ్రామా, ఎమోషన్ ఉన్నాయి. కలిసి నటించడం వల్ల ఆ పాత్రలకు మరింత భావోద్వేగ లోతు వచ్చిందని భావిస్తున్నాను.
నిజ జీవితంలో ఇద్దరు నటుల మధ్య ఉండే పరిచయం, అవగాహన కొన్నిసార్లు తెరపై వారి పాత్రల మధ్య సంబంధాన్ని మరింత సహజంగా చూపించడానికి ఉపయోగపడతాయి. ఈ సినిమాలో కూడా మా నిజ జీవిత పరిచయం పాత్రల భావోద్వేగాలను మరింత బలంగా చూపించడానికి సహాయపడిందని అనుకుంటున్నాను.
సినిమా చూసేటప్పుడు ప్రేక్షకులు కూడా ఆ అనుబంధాన్ని అనుభూతి చెందుతారు.
“రణబాలిలో నా పాత్రను రాహుల్ చాలా సహజంగా డిజైన్ చేశాడు”
ప్రశ్న: దర్శకుడు రాహుల్ సంకృత్యన్‌తో మీ అనుభవం ఎలా ఉంది?
విజయ్ దేవరకొండ: ‘రణబాలి’ సినిమాకు హార్ట్ అండ్ సోల్ దర్శకుడు రాహుల్ సంకృత్యన్. నేను, నిర్మాతలు మా అభిప్రాయాలను పంచుకుంటాం. కానీ సినిమా రూపకల్పన నుంచి ప్రతి అంశాన్ని పర్యవేక్షించడం వరకు ఆయన ఎంతో బాధ్యతగా వ్యవహరించారు.
ప్రతి పాత్రకు సరైన నటీనటులను ఎంపిక చేశారు. సినిమాలోని ప్రపంచం, పాత్రల స్వభావం, కథనం అన్నింటిపైనా ఆయనకు స్పష్టమైన అవగాహన ఉంది.
ఆర్నాల్డ్ వోస్లూ మంచి పెర్ఫార్మెన్స్ ఇచ్చారు. సినిమాలోని ప్రతి పాత్ర కథకు తగిన విధంగా ఉండేలా రాహుల్ జాగ్రత్తలు తీసుకున్నారు.
మాస్ అంశాలను, వాస్తవికతను, భావోద్వేగాలను సమతుల్యం చేయడం ఈ తరహా సినిమాలకు చాలా ముఖ్యం. రాహుల్ ఈ విషయంలో ప్రత్యేక శ్రద్ధ తీసుకున్నారు.
“రణబాలి ప్రేక్షకులకు గొప్ప సినిమాటిక్ అనుభూతిని అందిస్తుంది”
ప్రశ్న: ప్రేక్షకులు ఈ సినిమా నుంచి ఎలాంటి అనుభూతిని ఆశించవచ్చు?
విజయ్ దేవరకొండ: ‘రణబాలి’ ప్రేక్షకులకు గొప్ప సినిమాటిక్ అనుభూతిని అందిస్తుంది. సినిమా ఆద్యంతం ప్రేక్షకులను ఎంగేజ్ చేస్తుంది. మంచి ఎమోషనల్ హై ఇస్తుంది.
ఈ సినిమా చూసి థియేటర్ నుంచి బయటకు వచ్చిన తర్వాత మన చరిత్ర, మన సంస్కృతి గురించి మాట్లాడుకుంటారని నమ్ముతున్నాను. మన పూర్వీకులు ఎలాంటి పరిస్థితులను ఎదుర్కొన్నారు? మన సమాజంలో ఎలాంటి మార్పులు జరిగాయి? మన చరిత్రలో మరుగునపడిన వీరులు ఎవరు? అనే విషయాలపై ప్రేక్షకులు ఆలోచిస్తారు.
ఈ సినిమా కోసం మేమంతా ఎంతో కష్టపడ్డాం. కథకు తగ్గట్టుగా పాత్రలు, యాక్షన్, ఎమోషన్, విజువల్ వరల్డ్‌ను రూపొందించాం. ప్రేక్షకులు కేవలం సినిమా చూసి వెళ్లిపోవడం కాకుండా, ఆ ప్రపంచాన్ని కొంతకాలం గుర్తుంచుకోవాలని కోరుకుంటున్నాం.
“నా రాబోయే సినిమాలకు టికెట్ ధరల పెంపు ఉండదు”
ప్రశ్న: భారీ బడ్జెట్ సినిమాలకు టికెట్ ధరలు పెంచడంపై మీ అభిప్రాయం ఏమిటి?
విజయ్ దేవరకొండ: నేను కాలేజీలో చదువుకునే రోజుల్లో టికెట్ ధరలు పెరగడం వల్ల కొన్ని సినిమాలు చూడలేక బాధపడ్డాను. ఆ అనుభవాలు నాకు ఇప్పటికీ గుర్తున్నాయి.
ఒక హీరోగా నా సినిమాలకు టికెట్ ధరలు పెంచడం నాకు ఇష్టం ఉండదు. ప్రేక్షకులు నా సినిమాలను చూడాలనుకున్నప్పుడు టికెట్ ధరలు వారికి భారంగా మారకూడదని భావిస్తాను.
‘రణబాలి’ నుంచి నా రాబోయే సినిమాలకు టికెట్ ధరల పెంపు ఉండదని నిర్ణయించుకున్నాను. నా సినిమాలను వీలైనంత ఎక్కువ మంది ప్రేక్షకులు థియేటర్లలో చూడగలగాలి. ప్రేక్షకులకు అందుబాటులో ఉండేలా సినిమాలను తీసుకురావాలన్నదే నా ఉద్దేశం.
“విభిన్న ప్రాంతాల యాసలు, సంస్కృతులకు సంబంధించిన కథలు చేయాలనుంది”
ప్రశ్న: భవిష్యత్తులో ప్రాంతీయ నేపథ్యాలతో పాటు భక్తి ప్రధానమైన చిత్రాలు లేదా బయోపిక్స్ చేసే ఆలోచన ఉందా?
విజయ్ దేవరకొండ: విభిన్న ప్రాంతాల సంస్కృతి, భాష, జీవనశైలిని ప్రతిబింబించే కథలు చేయడం నాకు ఆసక్తికరంగా ఉంటుంది.
రాహుల్ సంకృత్యన్ నన్ను రాయలసీమ యాసలో హీరోగా చూపించాలనుకున్నారు. అలాగే రవి కిరణ్ కోలా గోదావరి జిల్లాల నేపథ్యంతో ఒక సినిమా చేస్తున్నారు. ఆ ప్రాంతానికి చెందిన యాస, సంస్కృతిలో నన్ను హీరోగా చూపించాలనేది ఆయన ఆలోచన.
ప్రతి ప్రాంతానికి ఒక ప్రత్యేకమైన గుర్తింపు ఉంటుంది. వారి భాష, సంప్రదాయాలు, కథలు వేర్వేరుగా ఉంటాయి. అలాంటి కథలు చేయడం నటుడిగా నాకు కొత్త అనుభవాలను అందిస్తుంది.
భవిష్యత్తులో మంచి భక్తి ప్రధానమైన సినిమా లేదా బయోపిక్ చేసే అవకాశం వస్తే తప్పకుండా పరిశీలిస్తాను. అలాంటి కథ ప్రేక్షకులకు ఆసక్తికరంగా ఉండటంతో పాటు నాకు కూడా నచ్చాలి.
ప్రస్తుతం ‘రణబాలి’ సినిమాను ప్రేక్షకుల ముందుకు తీసుకురావడానికి ఎంతో ఆసక్తిగా ఎదురుచూస్తున్నాను. ఒక ప్రత్యేకమైన ఉద్దేశంతో చేసిన ఈ సినిమా ప్రేక్షకులకు నచ్చుతుందని, వారి హృదయాలను తాకుతుందని ఆశిస్తున్నాను.
అక్టోబర్ 16న విజయదశమి సందర్భంగా ‘రణబాలి’ ప్రపంచవ్యాప్తంగా గ్రాండ్ థియేట్రికల్ రిలీజ్‌కు సిద్ధమవుతోంది.
