Sistla International Pre School Celebrates First Anniversary in Grand Style
ఘనంగా సిస్ట్లా ఇంటర్నేషనల్ ప్రీ స్కూల్ తొలి వార్షికోత్సవ వేడుకలు
రాజీవ్ కనకాల, వితికా షేరు, మోటివేషనల్ స్పీకర్ ప్రదీప్ కొండిపర్తి హాజరు
మణికొండ: సిస్ట్లా ఇంటర్నేషనల్ ప్రీ స్కూల్ తొలి వార్షికోత్సవ వేడుకలు మణికొండలో ఘనంగా జరిగాయి. గత ఏడాది అక్టోబర్‌లో ప్రారంభమైన ఈ విద్యాసంస్థ, చిన్నారులకు నాణ్యమైన విద్యను అందించడంతో పాటు వారిలో క్రమశిక్షణ, సృజనాత్మకత, మంచి విలువలు, చక్కని నడవడికను పెంపొందించే లక్ష్యంతో ముందుకు సాగుతోంది. ఈ వేడుకలకు సినీ ప్రముఖులు, విద్యావేత్తలు, విద్యార్థుల తల్లిదండ్రులు పెద్ద సంఖ్యలో హాజరయ్యారు.
సిస్ట్లా ఇంటర్నేషనల్ ప్రీ స్కూల్ చైర్మన్ లోహిత్ సిస్ట్లా ఆధ్వర్యంలో నిర్వహించిన ఈ కార్యక్రమానికి ప్రముఖ నటుడు రాజీవ్ కనకాల, నటి వితికా షేరు, మోటివేషనల్ స్పీకర్ ప్రదీప్ కొండిపర్తి ముఖ్య అతిథులుగా హాజరయ్యారు. చిన్నారుల ప్రతిభ, సృజనాత్మకతను ప్రతిబింబించే సాంస్కృతిక కార్యక్రమాలు, ప్రత్యేక ప్రదర్శనలు వేడుకలకు ప్రధాన ఆకర్షణగా నిలిచాయి.
ఈ సందర్భంగా మోటివేషనల్ స్పీకర్ ప్రదీప్ కొండిపర్తి మాట్లాడుతూ, సిస్ట్లా ఇంటర్నేషనల్ ప్రీ స్కూల్ తొలి వార్షికోత్సవ వేడుకల్లో పాల్గొనడం ఆనందంగా ఉందన్నారు. చైర్మన్ లోహిత్ సిస్ట్లాకు విద్యారంగంపై స్పష్టమైన దృక్పథం, భవిష్యత్తును దృష్టిలో ఉంచుకుని ముందుకు సాగగల దూరదృష్టి ఉన్నాయని ప్రశంసించారు. చిన్నారులకు విద్యతో పాటు క్రమశిక్షణ, మంచి విలువలను నేర్పించే లక్ష్యంతో విద్యాసంస్థను ఏర్పాటు చేయడం అభినందనీయమని పేర్కొన్నారు.
నటుడు రాజీవ్ కనకాల మాట్లాడుతూ, సిస్ట్లా స్కూల్ యాజమాన్యంతో తనకు మంచి అనుబంధం ఉందని తెలిపారు. చిన్నారులకు అందించాల్సిన విద్య, వారిలో పెంపొందించాల్సిన నైపుణ్యాల గురించి తన అభిప్రాయాలను పంచుకోవాలనే ఉద్దేశంతో ఈ కార్యక్రమానికి వచ్చానన్నారు. అయితే, స్కూల్ రూపొందించిన ఆడియో-విజువల్ ప్రజెంటేషన్‌ను చూసిన తర్వాత తాను చెప్పాలనుకున్న అనేక అంశాలు ఇప్పటికే పాఠ్యప్రణాళికలో భాగంగా ఉండటం ఆశ్చర్యం కలిగించిందని చెప్పారు. సిస్ట్లా ఇంటర్నేషనల్ ప్రీ స్కూల్ రాబోయే 25 ఏళ్లలో మరిన్ని విజయాలు సాధించి, ఎంతోమంది చిన్నారుల ఉజ్వల భవిష్యత్తుకు బలమైన పునాది వేయాలని ఆకాంక్షించారు.
నటి వితికా షేరు మాట్లాడుతూ, స్కూల్‌లో చిన్నారులను చూడటం ఎంతో ఆనందంగా ఉందన్నారు. ప్రతి ఒక్కరి జీవితంలో పాఠశాల విద్య కీలక పాత్ర పోషిస్తుందని పేర్కొన్నారు. తాను ఈ స్థాయికి చేరుకోవడంలో తన తల్లి అందించిన ప్రోత్సాహం, చిన్నప్పటి నుంచి ఆమె చూపిన శ్రద్ధ, మార్గదర్శకత్వం ఎంతో సహాయపడ్డాయని గుర్తుచేసుకున్నారు. చిన్నారుల ఎదుగుదలలో ప్రీ స్కూల్ విద్యకు ప్రత్యేక ప్రాధాన్యం ఉందని చెబుతూ, పిల్లల అభివృద్ధికి కృషి చేస్తున్న సిస్ట్లా ఇంటర్నేషనల్ ప్రీ స్కూల్‌ను అభినందించారు.
సిస్ట్లా ఇంటర్నేషనల్ ప్రీ స్కూల్ చైర్మన్ లోహిత్ సిస్ట్లా మాట్లాడుతూ, తన చిన్ననాటి అనుభవాలే ఈ విద్యాసంస్థ ఏర్పాటుకు ప్రేరణగా నిలిచాయని తెలిపారు. తాను చదువుకునే రోజుల్లో తన ఆసక్తులు, అభిరుచులకు అనుగుణంగా విద్యను అభ్యసించే అవకాశం ఉంటే బాగుండేదని భావించేవాడినని చెప్పారు. ఆ ఆలోచనతోనే చిన్నారులకు అంతర్జాతీయ ప్రమాణాలకు అనుగుణంగా, వారి వ్యక్తిగత ఆసక్తులు, సామర్థ్యాలకు ప్రాధాన్యమిస్తూ నాణ్యమైన విద్యను అందించాలనే ఉద్దేశంతో ఈ ప్రీ స్కూల్‌ను ప్రారంభించినట్లు వివరించారు.
తాను నిర్వహిస్తున్న ఇతర వ్యాపారాలతో పోలిస్తే ఈ విద్యాసంస్థతో తనకు ప్రత్యేకమైన భావోద్వేగ అనుబంధం ఉందని లోహిత్ సిస్ట్లా తెలిపారు. తొలి వార్షికోత్సవ వేడుకలను ఇంత ఘనంగా నిర్వహించుకోవడం ఎంతో సంతోషంగా ఉందని పేర్కొంటూ, భవిష్యత్తులో మరింత నాణ్యమైన విద్యను అందించేందుకు కృషి చేస్తామని వెల్లడించారు.
ఈ కార్యక్రమంలో స్కూల్ ప్రిన్సిపల్ మోఘోష్, విద్యార్థుల తల్లిదండ్రులు, ఇతర ప్రముఖులు పాల్గొన్నారు. ప్రముఖ వ్యాఖ్యాత నిహారిక తనదైన శైలిలో కార్యక్రమాన్ని ఆసక్తికరంగా నిర్వహించారు. కూచిపూడి నృత్య నిర్వాహకురాలు శోభ గోపు ఆధ్వర్యంలో కౌస్తుభ కూచిపూడి బృందం ప్రదర్శించిన కూచిపూడి నృత్యం ప్రేక్షకులను విశేషంగా ఆకట్టుకుంది.
చిన్నారుల ఉత్సాహభరితమైన ప్రదర్శనలు, అతిథుల స్ఫూర్తిదాయక సందేశాలు, సాంస్కృతిక కార్యక్రమాల నడుమ సిస్ట్లా ఇంటర్నేషనల్ ప్రీ స్కూల్ తొలి వార్షికోత్సవ వేడుకలు ఆనందోత్సాహాలతో ముగిశాయి. చిన్నారుల సమగ్ర అభివృద్ధికి నాణ్యమైన ప్రీ స్కూల్ విద్య ఎంత ముఖ్యమో ఈ వేడుక మరోసారి చాటిచెప్పింది.
