Ram Jagadish Pressmeet
నేచురల్ స్టార్ నాని వాల్ పోస్టర్ సినిమా ప్రెజెంట్ చేస్తున్న మూవీ ‘కోర్ట్’ – స్టేట్ వర్సెస్ ఎ నోబడీ’ ప్రియదర్శి ప్రధాన పాత్రలో నటిస్తున్న ఈ చిత్రాన్ని రామ్ జగదీష్ దర్శకత్వం వహించారు. ప్రశాంతి తిపిర్నేని నిర్మించారు. దీప్తి గంటా సహ నిర్మాతగా వ్యవహరించారు. ఇప్పటికే రిలీజైన ట్రైలర్ అలానే ప్రేమలో పాట కూడా ప్రేక్షకుల నుంచి అద్భుతమైన ప్రశంసలు అందుకున్నాయి. ఈ చిత్రం మార్చి 14న థియేటర్లలో విడుదలకు సిద్ధమవుతోంది. ఈ నేపథ్యంలో దర్శకుడు రామ్ జగదీష్ సినిమా విశేషాలు విలేకరుల సమావేశంలో పంచుకున్నారు.
జగదీష్ గారు ఈ కథ చేయడానికి మీకు స్ఫూర్తి?
-ఈ కథ ఫోక్సో యాక్ట్ నేపథ్యంలో ఉంటుంది. నిజజీవితంలో ఇలాంటి ఒక కేసుని నేను పరిశీలించాను. ఆ కేసు గురించి తెలుసుకున్నప్పుడు నిజంగా ఇలా కూడా ఉంటుందా అని సందేహంగా అనిపించింది. ఇలాంటి కేసులు ఇంకా చాలా ఉన్నాయని తెలిసింది. ఆ కేసులు అన్నిటి మీద కూడా రీసెర్చ్ చేశాను. ఏపీ తెలంగాణలో వందల కేసులు ఉన్నాయి. ఇవన్నీ స్క్రీన్ మీద అడ్రస్ చేస్తే బాగుంటుంది కదా అనిపించింది. ఈ కథ కోసం చాలా కేసు ఫైల్స్ చదివాను. అన్ని కేస్ ఫైల్స్ లో ఉన్న మెటీరియల్ తో ఒక మంచి కథ చెప్పొచ్చు కదా అనిపించింది. అవన్నీ ఒక కథగా చేసి స్క్రీన్ పై చూపించడం జరిగింది.
-ఇది పర్టికులర్ ఒక పర్సన్ రియల్ లైఫ్ ఇన్సిడెంట్ కి సంబంధించిన కథ కాదు. చాలా సంఘటనల స్ఫూర్తి ఉంది. ఇది కంప్లీట్ గా ఫిక్షనల్ కథ. చదివిన కేసుల ఎసెన్స్ తో ఒక ఫిక్షనల్ స్టోరీ చేయడం జరిగింది.
-ఈ సినిమా కోసం ఫోక్సో యాక్ట్ గురించి క్షుణ్ణంగా చదువుకున్నాను. కోర్టు, లా, పోలీస్ కి సంబధించిన చాలా మందిని కలసి చాలా విషయాలు గ్యాదర్ చేశాను.
నాని గారికి కథ చెప్పడం ఎలా అనిపించింది?
-నాని గారికి కథ చెప్పడం వెరీ హ్యాపీ మూమెంట్. ఆయనకి కథ చెప్పడానికి దాదాపు 8 నెలలు వెయిట్ చేశాను. ఫైనల్ గా ఆయన కథ వినే మూమెంట్ వచ్చింది. ఆయన కథ విన్న విధానం చూసి నాకు చాలా ఆనందంగా అనిపించింది. దాదాపు రెండున్నర గంటల కథని సింగిల్ సిటింగ్ లో విన్నారు. కథ మొత్తం విని నిల్చుని షేక్ హ్యాండ్ ఇచ్చి ‘వెల్కమ్ టు వాల్ పోస్టర్ సినిమా’ అన్నారు. అది నా జీవితంలో హై మూమెంట్. అది నిజంగా గ్రేట్ ఎక్స్పీరియన్స్.
చాలా కోర్ట్ రూమ్ డ్రామాలు వచ్చాయి కదా ఈ సినిమా ఎంత ప్రత్యేకంగా ఉండబోతుంది?
-చాలా కోర్ట్ రూమ్ డ్రామాలు చూసాం. కానీ ఒక లవ్ స్టోరీ ని కోర్ట్ రూమ్ డ్రామాగా ఎప్పుడు చూడలేదని భావిస్తున్నాను. ఇందులో లవ్ స్టోరీ, కోర్ట్ రూమ్ డ్రామా చాలా ప్రత్యేకంగా ఉంటాయి.
ఫోక్సో చట్టం ఈ కథలో ఏమేరకు ఉంటుంది?
-ఫోక్సో చాలా ముఖ్యమైన ఆక్ట్. నిజానికి ఆ చట్టం గురించి బయట ప్రపంచానికి చాలా తక్కువ తెలుసు. దాని గురించి కొంచెం డీటెయిల్ గా చెప్తే బాగుంటుందని అనిపించింది. అది ఈ సినిమాలో చూస్తారు.
రోషన్ శ్రీదేవి క్యారెక్టర్స్ గురించి?
-ఈ సినిమాలో అన్ని పాత్రలని ఆడిషన్స్ చేసి తీసుకున్నాం. చందు పాత్ర ప్లే చేయడానికి రోషన్ చాలా తపనపడ్డాడు. సెలెక్ట్ అయిన తర్వాత తను చేసిన ఫాలోఅప్ అద్భుతం. చాలా ఫ్యాషన్ చూపించాడు. చందు పాత్రని త్వరగానే క్లోజ్ చేసాం కానీ జాబిల్లి పాత్ర కోసం చాలా సెర్చ్ చేసాం. ఒక తెలుగు అమ్మాయి కావాలి, కొత్తగా ఉండాలి, సరైన ఏజ్ కావలి, నటన తెలిసి ఉండాలి ఇలాంటి కాంబినేషన్ ఉన్న అమ్మాయి కోసం చూస్తున్నప్పుడు ఒక దశలో దొరకదేమో అనుకున్నాం. అలాంటి సమయంలో నా ఫ్రెండ్ ఒక ఇన్స్టా ప్రొఫైల్ పంపించాడు. అందులో రీల్స్ చూస్తున్నప్పుడు ఒక రీల్ లో తను జాబిల్లిలా కనిపించింది. అడిషనల్ చేసాం. ఆ క్యారెక్టర్ కి పర్ఫెక్ట్ యాప్ట్ అయ్యింది,
ప్రియదర్శి గారి క్యారెక్టర్ గురించి?
-ఈ సినిమా ఐడియా మొదటగా ప్రియదర్శికే చెప్పాను. ఆయనకి చెప్పిన తర్వాత ఈ సినిమాని నేనే చేస్తాను. ఇంకా ఎవరికీ చెప్పొద్దు అన్నారు. ఆయనకే చెప్పాను. ఆయనతోనే చేశాను.
-ప్రియదర్శితో నాకు చాలా క్లోజ్ అసోషియేషన్. చాలా ఫ్రెండ్లీ గా వుంటాం. తనతో అన్నీ షేర్ చేసుకోగలను.
శివాజీ గారి క్యారెక్టర్ గురించి ?
-శివాజీ గారు మంగపతి క్యారెక్టర్ లో కనిపిస్తారు. ప్రతి ఫ్యామిలీలో అలాంటి ఒక క్యారెక్టర్ ఉంటుంది. ఇలాంటి ఒక సంఘటన జరిగినప్పుడు ప్రతి ఒక్కరు మంగపతి అవుతారు. రియల్ లైఫ్ క్యారెక్టర్ లా ఉంటుంది.
టెక్నికల్ గా సిన్మియా ఎలా వుంటుంది ?
– ఈ కథ అనుకున్నప్పుడే టెక్నికల్ మంచి స్టాండర్డ్ గా వుండాలని ఫిక్స్ అయ్యాం. విజయ్ బేబీ తో ప్రూవ్ చేసుకున్నారు. ఈ సినిమాకి కూడా బ్యూటీఫుల్ మ్యూజిక్ ఇచ్చారు.
-ఈ సినిమాకి దినేష్ పురుషోత్తమన్ డీవోపీగా చేశారు. ఆయన రెండు వందకోట్ల సినిమాలు చేసిన డీవోపీ. మా సినిమా కథ విని ఓకే చేశారు. విజువల్స్ చాలా లైవ్లీగా వుంటాయి.
పరిశ్రమలో మీ జర్నీ గురించి ?
-ఇంతకు ముందు అసిస్టెంట్ డైరెక్టర్ గా ఊర్వశివో రాక్షసివో చేశాను, రారా క్రిష్ణయ్యా సినిమాలు చేశాను. ఓ షార్ట్ ఫిల్మ్ చేశాను. దానికి బెస్ట్ డైరెక్టర్ అవార్డ్ వచ్చింది.
ప్రొడక్షన్ సైడ్ సపోర్ట్ ఎలా వుంది ?
-దీప్తి గారు సినిమాకి కావాల్సిన ప్రతిది సమకూర్చారు. ఏది ఎప్పుడు చేస్తే ఇన్ టైం లో ప్రాజెక్ట్ ఫినిష్ అవుతుందో అన్నీ పక్కాగా ప్లాన్ చేశారు. వాల్ పోస్టర్ సినిమాలో చేయడం నా అదృష్టం.
నాని గారు ఈ సినిమా ఖచ్చితంగా హిట్ అయి తీరుందని చెప్పడానికి కారణం?
– నాని గారు సినిమా చూశారు. సినిమాపై ఆయనకి వున్న కాన్ఫిడెన్స్ అది. ఆయన కాన్ఫిడెన్స్ అంతా సినిమా ఇచ్చిందే,
-నాని గారు సినిమా చూసి ‘ప్రౌడ్ అఫ్ యూ జగదీశ్’ అన్నారు. అది నాకు వచ్చిన బెస్ట్ కాంప్లీమెంట్
ఈ సినిమా గురించి ఆడియన్స్ కి ఏం చెబుతారు ?
-ఈ సినిమా మనందరి జీవితం. మనం తెలుసుకోవాల్సిన నిజం. స్క్రీన్ మీద మన జీవితమే వుంటుంది. మనల్ని మనం తెరపై చూసుకోవడానికి సినిమాకి రావాలని కోరుకుంటున్నాను.
-ఈ సినిమా విషయంలో అందరం చాలా హ్యాపీగా వున్నాం. నేను ఎలా వుండాలని అనుకున్నానో అలా వుంది సినిమా. నేను రాసింది అద్భుతంగా తెరపైకి వచ్చింది.
-ఇది కమర్షియల్ సినిమానే. సినిమా చూసి ఒకతను చుక్క రక్తం లేకుండా కమర్షియల్ సినిమా చూపించావ్ అన్నారు. ఆ మాట నాకు చాలా నచ్చింది.
ఆల్ ది బెస్ట్
-థాంక్ యూ
