“ప్రతి ఒక్కరిలోనూ ఓ కడలి ఉంటుంది”: వైష్ణవి చైతన్య

“ప్రతి ఒక్కరిలోనూ ఓ కడలి ఉంటుంది”: వైష్ణవి చైతన్య

“‘ఎపిక్ – ఫస్ట్ సెమిస్టర్’ను ఫ్యామిలీ ఆడియన్స్ కూడా చూడొచ్చు.. ప్రతి ఒక్కరిలోనూ ఓ కడలి ఉంటుంది”: వైష్ణవి చైతన్య

యంగ్ హీరో ఆనంద్ దేవరకొండ, హీరోయిన్ వైష్ణవి చైతన్య జంటగా నటించిన ‘బేబీ’ చిత్రం ఎంతటి విజయాన్ని అందుకుందో తెలిసిందే. ఈ హిట్ పెయిర్ మరోసారి ‘ఎపిక్ – ఫస్ట్ సెమిస్టర్’తో ప్రేక్షకుల ముందుకు వస్తోంది. ఆదిత్య హాసన్ దర్శకత్వం వహించిన ఈ యూత్‌ఫుల్ ఎంటర్‌టైనర్ సెప్టెంబర్ 11, 2026న ప్రపంచవ్యాప్తంగా థియేటర్లలో విడుదల కానుంది.

శ్రీకర స్టూడియోస్ సమర్పణలో సితార ఎంటర్‌టైన్‌మెంట్స్, ఫార్చ్యూన్ ఫోర్ సినిమాస్ బ్యానర్లపై సూర్యదేవర నాగవంశీ, సాయి సౌజన్య ఈ చిత్రాన్ని నిర్మించారు. ‘90s’ వెబ్ సిరీస్‌తో ప్రేక్షకులను ఆకట్టుకున్న ఆదిత్య హాసన్ ఈ సినిమాను తెరకెక్కించారు.

విడుదలకు ముందు హీరోయిన్ వైష్ణవి చైతన్య మీడియాతో ముచ్చటించారు. తన పాత్ర కడలి, ఆనంద్ దేవరకొండతో మరోసారి కలిసి పనిచేయడం, దర్శకుడు ఆదిత్య హాసన్, ‘ఎపిక్ – ఫస్ట్ సెమిస్టర్’ ప్రత్యేకత తదితర విషయాల గురించి ఆమె వెల్లడించిన విశేషాలు.

కడలి పాత్ర గురించి చెప్పండి?

కడలి చాలా స్ట్రాంగ్ అమ్మాయి. తన కోసం తాను నిలబడుతుంది. జీవితంలో తనకు ఏం కావాలో ఆమెకు చాలా క్లారిటీ ఉంటుంది. ప్రతి ఒక్కరిలోనూ ఒక కడలి ఉంటుందని నేను నమ్ముతాను. కానీ కుటుంబం, సమాజం, పరిస్థితుల కారణంగా మనలో ఉన్న ఆ వ్యక్తిత్వాన్ని చాలాసార్లు బయటకు తీసుకురాలేం.

జీవితంలో ఏదో ఒక దశలో ప్రతి ఒక్కరూ తమ కోసం తాము నిలబడాల్సి ఉంటుంది. అందుకే కడలి పాత్ర నాకు చాలా దగ్గరైంది.

‘బేబీ’ తర్వాత సినిమాల ఎంపికలో ఎలాంటి విషయాలను చూస్తున్నారు?

‘బేబీ’ తర్వాత నేను చేసే సినిమాల్లో, ముఖ్యంగా కథలో, నా పాత్రలో ఏదైనా కొత్తదనం ఉండాలని కోరుకున్నాను. ఆ పాత్రలో నన్ను నేను చూసుకోగలగాలి. నటిగా నాకు కొత్తగా ఏదైనా నేర్చుకునే అవకాశం ఉండాలి.

‘ఎపిక్ – ఫస్ట్ సెమిస్టర్’ కథ, కడలి పాత్రలో అలాంటి కొత్తదనం కనిపించింది. అందుకే ఈ సినిమాను ఎంచుకున్నాను.

దర్శకుడు ఆదిత్య హాసన్‌తో పనిచేయడం ఎలా అనిపించింది?

ఆదిత్యతో కలిసి పనిచేయడం చాలా సరదాగా ఉంటుంది. ఆయన జీవితాన్ని చాలా లోతుగా పరిశీలిస్తారు. మన చుట్టూ జరిగే చిన్న చిన్న విషయాలను కూడా చాలా జాగ్రత్తగా గమనిస్తారు. ఆ చిన్న విషయాల వెనుక ఉన్న భావాన్ని అర్థం చేసుకుని కథలో అందంగా చూపించగలరు.

‘ఎపిక్’లో కూడా ఆ విషయం కనిపిస్తుంది. ఆయన చాలా యూనిక్ డైరెక్టర్. నాకు ఇష్టమైన దర్శకుల్లో ఆదిత్య కూడా ఒకరు.

ఆదిత్య తొలిసారి ‘ఎపిక్’ కథ చెప్పడానికి వచ్చినప్పుడు ఆయనను కలిశాను. అయితే అంతకుముందే ఆయన దర్శకత్వం వహించిన ‘90s’ వెబ్ సిరీస్ చూశాను. ఆ సిరీస్ నాకు చాలా నచ్చింది.

‘బేబీ’ తర్వాత ఆనంద్ దేవరకొండతో మళ్లీ కలిసి నటించడం వల్ల ఒత్తిడి అనిపించిందా?

‘బేబీ’, ‘ఎపిక్ – ఫస్ట్ సెమిస్టర్’ రెండూ పూర్తిగా భిన్నమైన సినిమాలు. ‘బేబీ’ వల్ల ఎలాంటి ఒత్తిడి అనిపించలేదు. అయితే ఈ సినిమాను ఒక ఛాలెంజ్‌గా తీసుకున్నాం.

ఈ సినిమాలో మమ్మల్ని చూసినప్పుడు ప్రేక్షకులకు ‘బేబీ’ గుర్తుకు రాకూడదనేది మా ప్రయత్నం. ప్రేక్షకులు ఈ సినిమాను చూస్తున్నప్పుడు మమ్మల్ని కొత్త పాత్రల్లో చూస్తే, మేము సక్సెస్ అయినట్టే.

మొదటి నుంచి ‘ఎపిక్’పై మాకు చాలా నమ్మకం ఉంది. ప్రేక్షకులు ఈ సినిమాను కూడా ప్రేమిస్తారని భావిస్తున్నాం.

‘ఎపిక్’లోని ప్రేమకథలో కొత్తదనం ఏమిటి?

ఇప్పటివరకు మనం ఎన్నో ప్రేమకథలను చూశాం. కానీ ప్రతి ప్రేమకథలోనూ ఏదో ఒక ప్రత్యేకత ఉంటుంది. ‘ఎపిక్’లో ఇద్దరు వ్యక్తులు భిన్నమైన ఆలోచనలు, భిన్నమైన జీవన ప్రయాణాలతో చదువుకోవడానికి యూకే వెళ్తారు. అక్కడ ఒకరినొకరు కలుసుకుంటారు.

వాళ్లు కలిసి జీవించే సమయంలో జరిగే వ్యక్తిగత సంభాషణలు, అనుభవాల చుట్టూ కథ సాగుతుంది.

అమ్మాయి జీవితాన్ని ఒక విధంగా చూస్తే, అబ్బాయి మరో విధంగా చూస్తాడు. వాళ్లు ఎలా కలిశారు? వారి ఆలోచనలు ఎలా భిన్నంగా ఉన్నాయి? వారి మధ్య ఎలాంటి పరిణామాలు చోటుచేసుకున్నాయి? అనేది ఆసక్తికరంగా ఉంటుంది.

సినిమాలో అనవసరమైన హంగులు, ఆర్భాటాలు ఉండవు. చాలా సహజంగా, మనసుకు హత్తుకునేలా కథ ఉంటుంది.

సినిమాలో లివ్-ఇన్ రిలేషన్‌షిప్ అంశం ఉంది. ఫ్యామిలీ ఆడియన్స్ చూడొచ్చా?

ఖచ్చితంగా చూడొచ్చు. ఫ్యామిలీ ఆడియన్స్ కూడా ‘ఎపిక్’ను చూడవచ్చు.

సినిమాలో లివ్-ఇన్ రిలేషన్‌షిప్ గురించి చూపించాం కాబట్టి ‘90s’లా పూర్తిగా క్లీన్ ఎంటర్‌టైనర్ కాకపోవచ్చు. అయితే దర్శకుడు ఆదిత్య కథకు అవసరమైన విషయాలను మాత్రమే చూపించారు. ఫ్యామిలీ ఆడియన్స్‌ను కూడా దృష్టిలో పెట్టుకున్నారు.

ఎక్కడా ఇబ్బందికరంగా అనిపించే సన్నివేశాలు ఉండవు. కథకు అవసరమైన విధంగానే అన్నింటినీ సహజంగా చూపించారు. కాబట్టి కుటుంబంతో కలిసి సినిమా చూడొచ్చు.

కడలి పాత్ర ద్వారా మీరు నేర్చుకున్న విషయం ఏదైనా ఉందా?

అవును. కడలి పాత్ర నాకు నాపై నమ్మకం పెట్టుకోవడం నేర్పించింది.

కొన్ని విషయాలను బయటకు చెప్పడానికి నేను సాధారణంగా కొంచెం భయపడుతుంటాను. కానీ కడలి పాత్ర ద్వారా ముందుగా మనల్ని మనం నమ్ముకోవాలని, మన నిర్ణయాల విషయంలో కాన్ఫిడెంట్‌గా ఉండాలని నేర్చుకున్నాను.

ఇప్పటికే స్వతంత్ర భావాలు ఉన్న మహిళా పాత్రలతో చాలా సినిమాలు వచ్చాయి. అయితే ‘ఎపిక్’లో కడలి ప్రయాణం ప్రత్యేకంగా ఉంటుంది.

ఆమె ఒక సముద్రంలాంటిది. జీవితంలో ఎదురైన సమస్యను ఎదుర్కొంటూ, దాని నుంచి ఎలా బయటపడాలో తనకు తానే మార్గం వెతుక్కుంటుంది. కడలి పాత్రలో ఒక మంచి సందేశం కూడా ఉంది.

సితార బ్యానర్‌తో మరోసారి పనిచేయడం ఎలా అనిపించింది?

సితార బ్యానర్‌లో మరోసారి పనిచేయడం చాలా సంతోషంగా ఉంది. నాగవంశీ గారు ప్రతి ఒక్కరికీ చాలా స్వేచ్ఛ ఇస్తారు. అదే సమయంలో సినిమా విషయంలో ఎక్కడా రాజీ పడరు.

సినిమా అవుట్‌పుట్ బాగా రావాలన్నదే ఆయన ప్రధాన ఉద్దేశం. అలాంటి నిర్మాతతో పనిచేయడం నటీనటులకు చాలా కాన్ఫిడెన్స్ ఇస్తుంది.

ఈ బ్యానర్‌తో నాకు ప్రత్యేకమైన అనుబంధం ఉంది. ‘అల వైకుంఠపురములో’ సినిమా నాకు ఎంతో ఆశను ఇచ్చింది. జీవితంలో ప్రతి ఒక్కరూ పెద్ద లక్ష్యాలు పెట్టుకుని వాటిని సాధించవచ్చనే నమ్మకం కలిగించింది.

నా జీవితంలో కూడా అలాంటి అనుభవాన్ని పొందడం చాలా సంతోషంగా ఉంది. ఆ ఆనందాన్ని మాటల్లో పూర్తిగా చెప్పడం కష్టం.

మీ తదుపరి సినిమాల గురించి చెప్పండి?

ప్రస్తుతం సితార బ్యానర్‌లో నితిన్ గారితో కలిసి ఒక సినిమా చేస్తున్నాను. అలాగే రెండు తమిళ సినిమాలు, ఒక హిందీ సినిమా కూడా చేస్తున్నాను.

చివరిగా ప్రేక్షకులకు ఏం చెప్పాలనుకుంటున్నారు?

ప్రేక్షకులు ‘ఎపిక్ – ఫస్ట్ సెమిస్టర్’ను థియేటర్లలో చూసి ఎంజాయ్ చేయాలని కోరుకుంటున్నాను.

కడలి పాత్రతో, ఆనంద్ పాత్రతో, ఆదిత్య హాసన్ సృష్టించిన ప్రపంచంతో ప్రేక్షకులు కనెక్ట్ అవుతారని ఆశిస్తున్నాను. ముఖ్యంగా ఈ పాత్రల్లో, ఈ కథలో తమలోని కొంత భాగాన్ని ప్రేక్షకులు చూసుకుంటారని అనుకుంటున్నాను.

‘ఎపిక్ – ఫస్ట్ సెమిస్టర్’ సెప్టెంబర్ 11, 2026న ప్రపంచవ్యాప్తంగా గ్రాండ్‌గా థియేటర్లలో విడుదల కానుంది.