“‘EPIC – FIRST SEMESTER’ ఒక అందమైన జర్నీలా ఉంటుంది”: ఆనంద్ దేవరకొండ

“‘EPIC – FIRST SEMESTER’ ఒక అందమైన జర్నీలా ఉంటుంది”: ఆనంద్ దేవరకొండ

“మన నిజ జీవిత అనుభవాలను ప్రతిబింబించే కథ ఇది. ప్రేమ, కుటుంబం, బాధ్యతలను చాలా సహజంగా, అందంగా చూపించాం”

యూత్‌ఫుల్ ఎంటర్‌టైనర్‌గా తెరకెక్కిన ‘EPIC – FIRST SEMESTER’ చిత్రంతో మరోసారి ప్రేక్షకుల ముందుకు రాబోతున్నారు హీరో ఆనంద్ దేవరకొండ. ‘బేబీ’ చిత్రంతో ప్రేక్షకుల్లో మంచి క్రేజ్ సొంతం చేసుకున్న ఆనంద్ దేవరకొండ, వైష్ణవి చైతన్య మరోసారి జంటగా నటించిన ఈ చిత్రం సెప్టెంబర్ 11, 2026న గ్రాండ్ థియేట్రికల్ రిలీజ్‌కు సిద్ధమవుతోంది.

ప్రముఖ వెబ్ సిరీస్ **‘90s’**తో తెలుగు ప్రేక్షకుల మనసులు గెలుచుకున్న ఆదిత్య హాసన్ ఈ చిత్రంతో దర్శకుడిగా పరిచయం అవుతున్నారు. శ్రీకర స్టూడియోస్ సమర్పణలో సితార ఎంటర్‌టైన్‌మెంట్స్, ఫార్చూన్ ఫోర్ సినిమాస్ బ్యానర్లపై సూర్యదేవర నాగవంశీ, సాయి సౌజన్య ఈ చిత్రాన్ని నిర్మిస్తున్నారు.

విడుదలకు ముందు హీరో ఆనంద్ దేవరకొండ మీడియాతో ముచ్చటించారు. ఈ సందర్భంగా సినిమా కథ, తన పాత్ర, వైష్ణవి చైతన్య పోషించిన కాదలి పాత్ర, దర్శకుడు ఆదిత్య హాసన్‌తో వర్కింగ్ ఎక్స్‌పీరియన్స్, ‘బేబీ’తో పోలిక తదితర అంశాలపై ఆసక్తికర విషయాలను పంచుకున్నారు.

ప్రీ రిలీజ్ ఈవెంట్‌లో త్రివిక్రమ్ గారు చెప్పిన మాటను గుర్తు చేస్తూ సినిమా చాలా స్ట్రాంగ్‌గా ఉంటుందని చెప్పారు. అలా చెప్పడానికి కారణమేంటి?

త్రివిక్రమ్ గారు ఒక ఈవెంట్‌లో మాట్లాడుతూ.. ఒక సాధారణ కథను కూడా చాలా బలంగా చెప్పవచ్చని అన్నారు. కథను ఆసక్తికరంగా చెప్పడానికి తప్పనిసరిగా ట్విస్టులు, రక్తపాతం లాంటివి ఉండాల్సిన అవసరం లేదు. ‘EPIC – FIRST SEMESTER’ కూడా అలాంటి సాధారణమైన కథను చాలా బలంగా చెప్పిన సినిమా.

వనపర్తికి చెందిన ఒక సాధారణ యువకుడు తనకున్న ప్యాషన్‌ను పక్కన పెట్టి తల్లిదండ్రుల కోసం విదేశాలకు వెళ్తాడు. అక్కడికి వెళ్లిన తర్వాత అతని జీవితాన్ని చూసే విధానం ఎలా మారుతుంది? ఒక అమ్మాయిని ప్రేమించిన తర్వాత ఏం జరుగుతుంది? ఆమెతో లివ్-ఇన్ రిలేషన్‌షిప్‌లోకి వెళ్లిన తర్వాత అతని జీవితంలో ఎలాంటి మార్పులు వస్తాయి? అనే అంశాలను చాలా సహజంగా చూపించాం.

సినిమాలో లివ్-ఇన్ రిలేషన్‌షిప్ అనే కాన్సెప్ట్ ఉన్నప్పటికీ, దర్శకుడు ఆదిత్య దాన్ని చాలా సెన్సిటివ్‌గా, అందంగా తెరకెక్కించారు. కాబట్టి ఫ్యామిలీ ఆడియన్స్ కూడా ఎలాంటి ఇబ్బంది లేకుండా సినిమాను చూడవచ్చు.

‘EPIC – FIRST SEMESTER’ ద్వారా ప్రేక్షకులు ఎలాంటి అనుభూతిని పొందుతారు?

సినిమా ప్రారంభం నుంచే మా టీమ్ అంతా ఈ కథపై చాలా కాన్ఫిడెంట్‌గా ఉన్నాం. 80s, 90s, 2000s జనరేషన్ అనే తేడా లేకుండా అన్ని తరాల ప్రేక్షకులకు ఈ సినిమా కనెక్ట్ అవుతుందని నేను బలంగా నమ్ముతున్నాను.

విదేశాలకు చదువుకోవడానికి వెళ్లిన వాళ్లకే కాకుండా, జీవితంలో ఎప్పుడైనా కుటుంబానికి దూరంగా ఉన్న ప్రతి ఒక్కరికీ ఈ కథ కనెక్ట్ అవుతుంది.

ఒక మిడిల్ క్లాస్ యువకుడి జీవితంలో చిన్న చిన్న విషయాలకు కూడా ఎంతో ప్రాధాన్యత ఉంటుంది. కెరీర్, ప్రేమ, కుటుంబం, బాధ్యతలు ఇలా జీవితంలో ఎదురయ్యే ఎన్నో అంశాలను ఈ సినిమాలో చాలా సహజంగా చూపించాం.

ఇది ప్రతి ఒక్కరి కథలా అనిపిస్తుంది.

సినిమాలోని కొన్ని సన్నివేశాలు మన నిజ జీవితాన్ని అద్దంలో చూసుకున్నట్టుగా ఉంటాయి. ప్రేమ, కుటుంబం, బాధ్యతలు, బంధాలు.. ఇలా సినిమాలో చూపించిన ప్రతి అంశం గురించి ప్రేక్షకులు తమ అనుభవాలతో రిలేట్ అవుతారు.

ఇది ఒక రెగ్యులర్ సినిమా కాదు. ఒక అందమైన జర్నీలా ఉంటుంది.

ఆదిత్య పాత్రలో మిమ్మల్ని మీరు చూసుకున్నారా?

ఖచ్చితంగా. దాదాపు 100 శాతం నా కథతో రిలేట్ చేసుకున్నాను. EPIC కథ విన్న వెంటనే “ఇది నా కథలా ఉందే” అనిపించింది.

నేను అమెరికాలో చదువుకున్నాను. అందుకే సినిమాలోని చాలా అంశాలను వ్యక్తిగతంగా రిలేట్ చేసుకోగలిగాను. అమెరికా, యూకే, ఆస్ట్రేలియా, జర్మనీ.. ఇలా ఏ దేశానికి చదువుకోవడానికి వెళ్లిన తెలుగు యువత అయినా ఈ కథతో బాగా కనెక్ట్ అవుతారు.

చాలామంది తమ కుటుంబాలకు దూరంగా వెళ్లి, జీవితంలో స్థిరపడాలని, ఆర్థిక ఇబ్బందులను అధిగమించాలని ఆశిస్తూ విదేశాలకు వెళ్తారు. అలాంటి ప్రతి ఒక్కరినీ EPIC ఎమోషనల్‌గా కనెక్ట్ చేస్తుందని నమ్ముతున్నాను.

మీరు నటించిన ఆదిత్య పాత్ర గురించి చెప్పండి?

నేను నటించిన ఆదిత్య చాలా అమాయకమైన యువకుడు. జీవితంలో ఏం చేయాలి అనే విషయంలో అతను ఎప్పుడూ కన్ఫ్యూజన్‌లో ఉంటాడు.

తనకు నచ్చినట్లు జీవించాలా? లేక తల్లిదండ్రుల కోరిక మేరకు నడుచుకోవాలా? తనకు ఆ అమ్మాయిపై ఉన్నది నిజంగా ప్రేమేనా? ఆమెను పెళ్లి చేసుకోవాలా? ఆమెతో జీవితాంతం కలిసి ఉండగలడా? ఇలా ఎన్నో ప్రశ్నలు అతని మనసులో తిరుగుతుంటాయి.

ఆదిత్య ప్రయాణంలో ప్రతి సన్నివేశం, ప్రతి డైలాగ్ ప్రేక్షకులను ఎమోషనల్‌గా టచ్ చేసేలా డిజైన్ చేశాం.

‘బేబీ’ సినిమా ప్రభావం ‘EPIC’పై ఎంతవరకు ఉంటుంది?

బేబీ చాలా పెద్ద విజయం సాధించింది. అందుకే నేను, వైష్ణవి కలిసి నటించినప్పుడల్లా సహజంగానే అందరూ బేబీ సినిమా గురించి మాట్లాడుతారు.

అయితే బేబీ, EPIC సినిమాలకు అసలు పోలిక లేదు. రెండు సినిమాలు వాటి ప్రత్యేకతతో ఉంటాయి.

బేబీ ఒక సెన్సేషన్ అయితే.. EPIC ఒక అందమైన జర్నీలా ఉంటుంది.

నేను, వైష్ణవి మరోసారి కలిసి నటిస్తున్నామని ప్రేక్షకులు ఆసక్తిగా చూస్తున్నారు. అదే సమయంలో 90s వెబ్ సిరీస్, దర్శకుడు ఆదిత్య హాసన్ గురించి కూడా అందరూ మాట్లాడుతున్నారు. ఇది సినిమాకు కచ్చితంగా ప్లస్ పాయింట్.

‘EPIC – FIRST SEMESTER’ ‘90s’ వెబ్ సిరీస్‌కు కొనసాగింపా?

లేదు. EPIC అనేది 90sకు సీక్వెల్ కాదు. అయితే ఆ ప్రపంచం, ఆ క్యారెక్టర్స్ నుంచి ఈ కథ పుట్టింది.

కథలో చిన్న కొడుకు ఆదిత్య విదేశాలకు చదువుకోవడానికి వెళ్లిన తర్వాత అతని జీవితంలో జరిగే పరిణామాల చుట్టూ సినిమా సాగుతుంది. కథకు అవసరమైన మేరకే తల్లిదండ్రుల పాత్రలను సినిమాలో తీసుకొచ్చాం.

90s ఒక ఫ్యామిలీ స్టోరీ అయితే, EPIC ఒక లవ్ స్టోరీ. అయితే 90sలో ఉన్నట్లుగానే ఈ సినిమాలో కూడా సహజమైన హ్యూమర్, హార్ట్‌ఫెల్ట్ ఎమోషన్స్ ఉంటాయి.

వైష్ణవి చైతన్య పోషించిన కాదలి పాత్ర గురించి చెప్పండి?

కాదలి పాత్ర ప్రతి అమ్మాయికి రిలేట్ అయ్యేలా ఉంటుంది.

ఒక అమ్మాయి బయటికి నవ్వుతూ కనిపిస్తోందని ఆమె సంతోషంగా ఉందని అనుకోవాల్సిన అవసరం లేదు. ఆ నవ్వు వెనుక ఎన్నో భయాలు, బాధ్యతలు, సమస్యలు, సంఘర్షణలు ఉండవచ్చు.

కాదలి పాత్ర అలాంటి భావోద్వేగాలను ప్రతిబింబిస్తుంది. ఈ పాత్రతో అమ్మాయిలు చాలా బాగా కనెక్ట్ అవుతారని భావిస్తున్నాను.

మీ వదిన రష్మిక మందన్నతో సినిమాల గురించి చర్చిస్తుంటారా?

మేము సాధారణంగా సినిమాల గురించి పెద్దగా చర్చించుకోము. అయితే EPIC రిలీజ్ డేట్ విషయంలో కొంత టెన్షన్‌లో ఉన్నప్పుడు ఆమె నాకు మెంటల్‌గా చాలా సపోర్ట్ చేసింది. నా పక్కన నిలబడింది.

మీ తదుపరి సినిమాల గురించి చెప్పండి?

‘తక్షకుడు’ సినిమా షూటింగ్ పూర్తయింది. అలాగే ఒక ఇండో-కొరియన్ సినిమా కూడా పూర్తి చేశాను.

యూత్, ఫ్యామిలీ ఆడియన్స్‌కు కనెక్ట్ అయ్యే ప్రేమకథగా రూపొందిన **‘EPIC – FIRST SEMESTER’**తో ఆనంద్ దేవరకొండ, వైష్ణవి చైతన్య మరోసారి ప్రేక్షకుల ముందుకు వస్తున్నారు. సెప్టెంబర్ 11, 2026న ఈ చిత్రం థియేటర్లలో గ్రాండ్‌గా విడుదల కానుంది.