‘AH’ ఫస్ట్ లుక్ విడుదల.. రక్తపు మరకల మధ్య రాహుల్ విజయ్ ఇంటెన్స్ లుక్!

‘AH’ ఫస్ట్ లుక్ విడుదల.. రక్తపు మరకల మధ్య రాహుల్ విజయ్ ఇంటెన్స్ లుక్!

యంగ్ అండ్ టాలెంటెడ్ హీరో రాహుల్ విజయ్ ప్రధాన పాత్రలో నటిస్తున్న ఆసక్తికరమైన థ్రిల్లర్ ‘AH’. స్టార్ బాక్స్ స్టోరీస్, రిపుల్ స్లైడ్ స్టూడియోస్ బ్యానర్లపై తెరకెక్కుతున్న ఈ చిత్రంతో ఈ రెండు నిర్మాణ సంస్థలు టాలీవుడ్‌లోకి అడుగుపెడుతున్నాయి. కనకరావు టోనంగి, అభిషేక్, ప్రముఖ ఎడిటర్-డైరెక్టర్ గ్యారీ BH నిర్మిస్తున్న ఈ చిత్రానికి సాయి బాలి దర్శకత్వం వహిస్తున్నారు. రాహుల్ విజయ్ సరసన ఆర్చన అయ్యర్ కథానాయికగా నటిస్తోంది.

తాజాగా ఈ సినిమాకు సంబంధించిన టైటిల్ మరియు ఫస్ట్ లుక్‌ను ‘హిట్ మెషిన్’ అడివి శేష్ విడుదల చేశారు. ‘AH’ అనే ఆసక్తికరమైన టైటిల్‌తో పాటు మేకర్స్ అందించిన డిజైన్ సినిమాపై క్యూరియాసిటీని మరింత పెంచుతోంది.

‘AH’ టైటిల్ వెనుక అసలు కథేంటి?

‘AH’ టైటిల్ చుట్టూ అమ్మాయి, అదృశ్యం, అన్వేషణ అనే పదాలను ఉంచడం ద్వారా సినిమా కథపై ఆసక్తిని రేకెత్తించారు. అమ్మాయిల అదృశ్యం, దాని వెనుక ఉన్న కారణాలు, వాటిని ఛేదించే అన్వేషణ చుట్టూ కథ సాగనున్నట్లు ఈ పదాలు సూచిస్తున్నాయి.

అదే సమయంలో అనుమానం, ఆశాంకితం, అమానుషం వంటి పదాలు సినిమాపై మరింత మిస్టరీని క్రియేట్ చేస్తున్నాయి. టైటిల్ డిజైన్‌లోనే ఇన్ని ప్రశ్నలను రేకెత్తించడం ద్వారా ‘AH’ సాధారణ మిస్సింగ్ కేస్ థ్రిల్లర్ కాదనే ఆసక్తిని కలిగిస్తోంది.

రక్తపు మరకల మధ్య రాహుల్ విజయ్ ఇంటెన్స్ లుక్

ఫస్ట్ లుక్ విషయానికి వస్తే.. రాహుల్ విజయ్ ఒక చేతిలో లాఠీ పట్టుకుని, చుట్టూ రక్తపు మరకలతో కనిపిస్తున్న తీరు సినిమాపై అంచనాలను పెంచుతోంది. బ్యాక్‌గ్రౌండ్‌లో కనిపిస్తున్న చార్మినార్.. ఈ కథ హైదరాబాద్ నేపథ్యంలో సాగుతుందనే విషయాన్ని సూచిస్తోంది.

రాహుల్ విజయ్ లుక్, అతని బాడీ లాంగ్వేజ్, చుట్టూ కనిపిస్తున్న డార్క్ అండ్ టెన్స్ వాతావరణం సినిమాకు సంబంధించిన కథ ఎంత ఇంటెన్స్‌గా ఉండబోతుందో తెలియజేస్తున్నాయి. ఫస్ట్ లుక్‌లోనే మిస్టరీ, సస్పెన్స్, ఇన్వెస్టిగేషన్ అంశాలను హైలైట్ చేయడం విశేషం.

బలమైన సాంకేతిక బృందం

ఈ చిత్రానికి సాయి బాలి దర్శకత్వం వహిస్తుండగా, శ్రీ చరణ్ పాకాల సంగీతం అందిస్తున్నారు. మోనిష్ భూపతి రాజు సినిమాటోగ్రఫీ బాధ్యతలు నిర్వహిస్తున్నారు. అభినవ్ వి. కునపరెడ్డి సహ నిర్మాతగా వ్యవహరిస్తూ ఎడిటింగ్ బాధ్యతలను ప్రముఖ ఎడిటర్ గ్యారీ BHతో కలిసి నిర్వహిస్తున్నారు.

రాహుల్ విజయ్, ఆర్చన అయ్యర్ జంటగా నటిస్తున్న ఈ చిత్రంపై టైటిల్, ఫస్ట్ లుక్‌తోనే ఆసక్తి నెలకొంది. అమ్మాయిల అదృశ్యం, అన్వేషణ, అనుమానం, అమానుషం వంటి అంశాల చుట్టూ అల్లుకున్న కథ ప్రేక్షకులకు ఎలాంటి థ్రిల్లింగ్ అనుభూతిని అందించనుందో చూడాలి.

‘AH’ గ్రాండ్ థియేట్రికల్ రిలీజ్‌కు సిద్ధమవుతోంది. త్వరలోనే సినిమా విడుదల తేదీతో పాటు మరిన్ని ఆసక్తికరమైన వివరాలను మేకర్స్ వెల్లడించనున్నారు.