“ఇరుముడి’లో ఇప్పటివరకు చేయని పాత్రలో కనిపిస్తాను.. థ్రిల్‌తో పాటు అద్భుతమైన ఎమోషన్స్ ఉంటాయి: ప్రియా భవానీ శంకర్

“‘ఇరుముడి’లో ఇప్పటివరకు చేయని పాత్రలో కనిపిస్తాను.. థ్రిల్‌తో పాటు అద్భుతమైన ఎమోషన్స్ ఉంటాయి: ప్రియా భవానీ శంకర్”

మాస్ మహారాజా రవితేజ హీరోగా, ప్రియా భవానీ శంకర్ హీరోయిన్‌గా నటించిన మోస్ట్ అవైటెడ్ మూవీ ‘ఇరుముడి’. విలక్షణమైన కథాంశంతో తెరకెక్కుతున్న ఈ చిత్రానికి శివ నిర్వాణ దర్శకత్వం వహించగా, మైత్రి మూవీ మేకర్స్ ప్రతిష్టాత్మకంగా నిర్మించారు. ఇప్పటికే విడుదలైన గ్లింప్స్, ట్రైలర్, పాటలు సినిమాపై ఆసక్తిని మరింత పెంచాయి. ఆగస్టు 21న ప్రపంచవ్యాప్తంగా థియేటర్లలోకి రానున్న ఈ చిత్రం యాక్షన్, థ్రిల్‌తో పాటు బలమైన కుటుంబ భావోద్వేగాలను అందించనుంది.

ఈ సందర్భంగా హీరోయిన్ ప్రియా భవానీ శంకర్ మీడియాతో ముచ్చటించారు. సినిమాలో తన పాత్ర, రవితేజతో వర్కింగ్ ఎక్స్‌పీరియన్స్, దర్శకుడు శివ నిర్వాణ, షూటింగ్ అనుభవాలు, మ్యూజిక్, తన రాబోయే ప్రాజెక్ట్స్ తదితర విషయాలను ఆమె పంచుకున్నారు.

‘ఇరుముడి’లో కావేరి పాత్ర ఎలా ఉంటుంది?

ట్రైలర్ చూస్తే కథ గురించి ఇప్పటికే ఒక ఐడియా వచ్చి ఉంటుంది. కావేరి ఒక సింపుల్ ఫ్యామిలీ ఉమెన్. భర్త, కూతురే ఆమె ప్రపంచం. కుటుంబాన్ని ఎంతో శ్రద్ధగా చూసుకునే వ్యక్తి. ఈ పాత్ర చేయడం నాకు చాలా కొత్త అనుభూతిని ఇచ్చింది. ఇప్పటివరకు నేను ఇలాంటి పాత్ర చేయలేదు.

నిజ జీవితంలో మన చుట్టూ కనిపించే ఎంతోమంది మహిళల్లో కావేరి పాత్రను చూడొచ్చు. అందుకే ప్రేక్షకులకు ఈ క్యారెక్టర్ చాలా ఈజీగా కనెక్ట్ అవుతుందని అనుకుంటున్నాను.

శివ నిర్వాణ కథ చెప్పినప్పుడు మిమ్మల్ని ఆకట్టుకున్న అంశం ఏమిటి?

శివ నిర్వాణ గారు అద్భుతమైన కథలు, పాత్రలు రాస్తారు. ఆయన కథ చెప్పినప్పుడు నాకు చాలా నచ్చింది. ఆయన గత చిత్రాలను కూడా చూశాను. ముఖ్యంగా ‘నిన్ను కోరి’ నాకు చాలా ఇష్టమైన సినిమా. నేను చాలా తెలుగు సినిమాలు చూస్తుంటాను.

‘ఇరుముడి’లో ఫాదర్-డాటర్ ఎమోషన్ చాలా యూనివర్సల్‌గా ఉంటుంది. ప్రపంచంలో ఎక్కడ ఉన్నా తల్లిదండ్రులు, పిల్లల మధ్య ఉండే అనుబంధం ఒకేలా ఉంటుంది. అందుకే ఈ సినిమాలోని పాత్రలు, భావోద్వేగాలు ప్రతి ఒక్కరికీ కనెక్ట్ అవుతాయని నమ్ముతున్నాను.

రవితేజతో కలిసి నటించడం ఎలా అనిపించింది?

రవితేజ గారు అద్భుతమైన ఎనర్జీ ఉన్న యాక్టర్. ఆయన ఎనర్జీని మ్యాచ్ చేయడం అంత ఈజీ కాదు. ఆయన సినిమాలు చాలా చూశాను. కానీ ఆయనతో కలిసి నటిస్తున్నప్పుడు మాత్రం నాకు పూర్తిగా కొత్త వ్యక్తిలా అనిపించారు.

చాలా డౌన్ టు ఎర్త్‌గా ఉంటారు. ఆయన గొప్ప పెర్ఫార్మర్. ఆయనతో కలిసి పని చేయడం నాకు చాలా మంచి అనుభవం.

శివ నిర్వాణతో వర్క్ చేయడం ఎలా అనిపించింది?

శివ నిర్వాణ గారు నటీనటులకు చాలా స్వేచ్ఛ ఇస్తారు. ఒక సీన్ గురించి యాక్టర్స్‌తో చర్చిస్తారు. మంచి సజెషన్స్ ఉంటే స్వీకరిస్తారు. ఇది ఆయనలో నాకు బాగా నచ్చిన విషయం.

ఆయన చాలా పాజిటివ్‌గా, కూల్‌గా ఉంటారు. ఆయనతో కలిసి పనిచేస్తున్నప్పుడు చాలా కంఫర్ట్‌గా అనిపించింది.

కావేరి పాత్రలో మీకు ఎదురైన ఛాలెంజ్ ఏమిటి?

నిజ జీవితంలో నాకు, కావేరి పాత్రకు అసలు పోలిక లేదు. నేను రియల్ లైఫ్‌లో ఆమెకు చాలా భిన్నంగా ఉంటాను. ఒక నటిగా మన వ్యక్తిత్వానికి పూర్తి భిన్నమైన పాత్రలు చేయడం చాలా ఆసక్తికరంగా ఉంటుంది.

అయితే ఈ సినిమాలో తెలుగు విషయంలో కొంత ఛాలెంజ్ ఎదురైంది. ఇది అర్బన్ తెలుగు కాదు. పల్లెటూరి యాసలో డైలాగ్స్ చెప్పాలి. ఆ యాసను, డైలాగ్ డెలివరీని సరిగ్గా పట్టుకోవడం నాకు ఛాలెంజింగ్‌గా అనిపించింది.

సీలేరు షూటింగ్ అనుభవం ఎలా ఉంది?

దాదాపు 30 రోజుల పాటు సీలేరు ప్రాంతంలో జరిగిన షూటింగ్‌లో పాల్గొన్నాను. అక్కడి లొకేషన్స్ సినిమాకు కావాల్సిన యాక్షన్ థ్రిల్లర్ టోన్‌ను మరింత బలంగా తీసుకొచ్చాయి.

అయితే రిమోట్ ఏరియాల్లో షూటింగ్ చేయడం అంత సులభం కాదు. అయినప్పటికీ మొత్తం టీమ్ ఎంతో అంకితభావంతో పనిచేసింది. ఆ షూటింగ్ అనుభవం చాలా ప్రత్యేకంగా నిలిచిపోయింది.

‘ఇరుముడి’ ప్రేక్షకులకు ఎలాంటి అనుభూతిని ఇస్తుంది?

ట్రైలర్‌లో రవితేజ గారు తన పాపను ఎంత ప్రేమగా, బాధ్యతగా పెంచుతున్నారో చూసి ఉంటారు. పిల్లలకు ఏం జరిగినా తల్లిదండ్రులతో ఓపెన్‌గా చెప్పగలిగే కంఫర్ట్ ఉండటం చాలా ముఖ్యం.

పేరెంట్స్ అలాంటి వాతావరణాన్ని పిల్లలకు కల్పించాలి. సినిమాలో కూడా ఈ అంశాన్ని చాలా సెన్సిటివ్‌గా చూపించాం. సినిమా చూసిన తర్వాత పిల్లలతో తల్లిదండ్రుల అనుబంధం గురించి ఆలోచించేలా చేస్తుంది.

‘ఇరుముడి’లో థ్రిల్ మాత్రమే కాదు.. మంచి ఎమోషనల్ కనెక్షన్ కూడా ఉంటుంది. అందుకే ఇది అన్ని వర్గాల ప్రేక్షకులకు కనెక్ట్ అవుతుందని భావిస్తున్నాను.

జీవీ ప్రకాష్ కుమార్ మ్యూజిక్ గురించి?

జీవీ ప్రకాష్ గారు నేషనల్ అవార్డ్ విన్నింగ్ కంపోజర్. ఆయన ప్రతి ఆల్బమ్ ప్రత్యేకంగా ఉంటుంది. ‘ఇరుముడి’లో ఆయన భాగమైన వెంటనే సినిమాపై చాలా ఎగ్జైటెడ్‌గా ఉన్నారు.

ఇది క్లాసిక్ కల్ట్ సినిమాగా నిలుస్తుందని, ఖచ్చితంగా బ్లాక్‌బస్టర్ అవుతుందని ఆయన మెసేజ్ చేశారు. ఆయనకు కూడా సినిమా పట్ల చాలా నమ్మకం ఉంది.

మైత్రి మూవీ మేకర్స్‌తో వర్క్ చేయడం ఎలా అనిపించింది?

మైత్రి మూవీ మేకర్స్ ఇండియాలోనే బిగ్గెస్ట్ ప్రొడక్షన్ హౌసెస్‌లో ఒకటి. ప్రతి సినిమాను ఎంతో గ్రాండ్‌గా, ప్యాషన్‌తో నిర్మిస్తారు. ‘ఇరుముడి’ షూటింగ్ కూడా చాలా సవాళ్లతో కూడుకున్నది.

అయినా మైత్రి మూవీ మేకర్స్ టీమ్ ప్రతి ఒక్కరినీ ఎంతో జాగ్రత్తగా చూసుకుంది. వారి నిర్మాణంలో పనిచేయడం చాలా మంచి అనుభూతిని ఇచ్చింది.

మీ డ్రీమ్ రోల్స్ ఏమైనా ఉన్నాయా?

నేను చాలా హ్యాపీ పర్సన్‌ని. ఇప్పటివరకు సీరియస్ పాత్రలు ఎక్కువగా చేశాను. ఇకపై మంచి ఫన్ ఉన్న క్యారెక్టర్స్ చేయాలని ఉంది. ఈ విషయాన్ని శివ నిర్వాణ గారితో కూడా చెప్పాను (నవ్వుతూ).

ప్రేక్షకులను నవ్వించే, ఎంటర్‌టైన్ చేసే మంచి సినిమా చేయాలనే కోరిక ఉంది.

మీ రాబోయే ప్రాజెక్ట్స్ గురించి?

‘దూత 2’ షూటింగ్ ఇప్పటికే ప్రారంభమైంది. ఇది తొలి భాగానికి కొనసాగింపుగా ఉంటుంది. అలాగే ‘డిమోంటి కాలనీ 3’ కూడా రిలీజ్‌కు సిద్ధమవుతోంది. వీటితో పాటు మరికొన్ని ప్రాజెక్ట్స్ చర్చల దశలో ఉన్నాయి.

‘ఇరుముడి’లో కావేరి పాత్ర ప్రేక్షకులకు కొత్తగా అనిపిస్తుంది. థ్రిల్, యాక్షన్‌తో పాటు కుటుంబ భావోద్వేగాలను మిళితం చేసిన ఈ చిత్రం ప్రేక్షకులకు ఒక ప్రత్యేకమైన థియేట్రికల్ ఎక్స్‌పీరియన్స్‌ను అందిస్తుందని ప్రియా భవానీ శంకర్ నమ్మకం వ్యక్తం చేశారు.